uMthunywa
YiNtatheli kaMthunywa
IZIKOLO zemfundo ye-primary ngomnyaka ozayo kuzamele zikhuthalele ukuncintisa kumdlalo we-volleyball.
La ngamazwi enhlanganiso yabaphathi yeNational Association of Primary Heads (NASH).
Inhlanganiso le, kubikwa iphakathi kokukhankasela ukugcwaliswa kwemncintiswano yemidlalo yonke ezikolo.
Sekuvele ukuthi inengi lababalisi liwuthathela phansi umdlalo we-volleyball, okuyikho osekuvuse inkophe zabaphathi bezikolo.
Ekhuluma lentatheli umsekeli kamgcinisihlalo kulinhlanganiso esiqintini seLupane uNkosinathi Moyo ubike ukuba inhlanganiso yakhe izaqhuba uhlelo lokuhlomisa ababalisi ngomdlalo lo izikolo zisanda kuvulwa.
“NjengeLupane District, kulemidlalo eyenza singenzi kuhle emncintiswaneni ngoba kubangelwa yikuthi asiphatheki kweminye imidlalo. Kungakho sithi lonyaka kumele kube lomehluko, siphatheke kiyo yonke imidlalo,” kubika uMoyo.
UMoyo ubike ukuba ukhuthaza ababalisi besifazana ikakhulu ukuthi babeyingxenye yalo umkhosi wona ozaphathwa ngabaqondisi (Instructors) abalolwazi olugcweleyo.
“Sesike sakubona ukuthi indlela esiphatha ngayo imidlalo ezikolo yahlukene lalokho esihlangana lakho emncintiswaneni ephezulu kungakho kumele sihambelane lesikhathi ngoba layo imithetho yemidlalo itshintsha ukusa kwamalanga,” kuveza uMoyo.
Ebuzwa ngendaba yokuthi abantwana ikakhulu abasemakhaya abalancwadi zokuzalwa noma iminyaka yabo ivuma ukuthi badlale uMoyo uthe lokhu bayakwazi mhlophe kodwa kubalulekile ukuthi ababalisi bawulandele lumthetho ngoba ukuwephula kulesigwebo esithile.
“NjengeNaph silesu lokuthi siyebonana lalabo ababona ngokutholwa kwezincwadi lezi ukuze kube leMobile Registration okuluhlelo lapho abantwana abazathola khona ithuba lokudingelwa lezoncwadi,” kuchaza uMoyo.
UMoyo uphethe ngokuthi loluhlelo luzaqhutshwa kumaZone okuzenza abafundi benelise ukuyafinyelela lapho okuthathiswa khona incwadi lezi.
