uMthunywa
YiNtatheli kaMthunywa
AMATHIMU asacathula kumdlalo wenguqu esigabeni seTsholotsho asekhalela ukudlala kuligi kaDivision 2 ngoba ethi lawo asefuna ukubonakala.
Amaqembu la emelwe yiTsholotsho District Football Association (Tshodifa) abeke isikhalazo sawo kubhodi yenhlanganiso yeZimbabwe Football Association eMatabeleland North.
Iligi eqhutshwa yiTshodifa ilamaqembu alitshumi abalisa iBlack Swallows, iSilo GMB, iTsholotsho Pirates, iMedicuf, Ihatshi Elimhlophe, i-Amakhosi, iDinyane, iVuka, iMadona leGreen Warriors.
Wonke la ngamathimu angena nyakenye. Kulisizini amathimu amabili iTsholotsho FC Under-19 leMazibisa lawo athembisa ukudlala kuligi le.
Umgcinisihlalo weTshodifa uMelusi Ndebele ubike ukuba kungumbono wamaqembu ukuthi iZifa incede ngokukweza iligi yeTshodifa ibe nguDivision two.
“Amaqembu awakhanyi nxa edlala kuTshodifa. Sifuna ukuthi iZifa lapha eMat North ilalele isikhalazo sethu sokuthi sifuna ukuphathwa njengamathimu akuDivision 2.
“Yikho lokhu okufunwa ngamaqembu lapha. IZifa sayitshela njalo salobela umgcinisihlalo weZifa uDennis Tshuma ngalokhu.
Iqembu elikhulu kuTsholotsho Pirates eselidlala kuligi kaDivision one laqala ukuhlupha lingaphansi kweTshodifa.
Ithimu le yasuka yangena kuligi eyayidlalwa ngamaqembu akoBulawayo ngoba iTshodifa ikhangelelwa phansi.
