uMthunywa
Johas Moyo
INHLANGANISO ezimeleyo iEbenezer Training Centre eseMatopo isiphathise abatsha abanengi ngokubafundisa amakhosi atshiyeneyo alakho ukubenza bathole indlela zokuzinakekela kwelakusasa.
Kunhlanganiso le abatsha bavulelwa amathuba okuthuthuka ngokufundiswa bekumaqembu atshiyeneyo kuzifundo zokulima, ezokufuya, ukufunda ngendlela zokuphatha kuhle amabhizimusi kanye lezenkolo njengoba inhlanganiso ikhokhelwa ngamakholwa.
I-Ebenezer Training Centre isebenza labatsha abaleminyaka engu-18 kusiya ku-23 abathola ukufunda kumakhosi amathathu atshiyeneyo atholakala lapho. Ikhosi yakuqala ngeyenyanga ezithathu kuphela, kuthi eyesibili ngeyomnyaka owodwa kukanti eyokucina ngethatha iminyaka emibili.
UMnu Brilliant Khoza ofundisa kulindawo ubike ukuthi inhlanganiso le yaqalisa ngomnyaka ka2007 kulabafundi abangu-16 kuhlangene abafana lamankazana njalo uthi bayajabula ngentuthuko ekhona ngoba lonyaka balabafundi abangu-82. Uthe ukuze umuntu aqale izifundo lezi akudingakali ukuthi abengolezathifikethi zeO-level kumbe A-level, okudingakalayo yikuthi umuntu abengowenelisa ukubhala lokubala, okunengi ukufunda esephakathi.
“Lapha sifundisa abasakhulayo ngezokulima okugoqela ukulima ngokuthelezela (irrigation). Lapha sibafundisa ukulima imihlobo yonke yezilimo njalo sikhuthaza ikakhulu abantwana bonke abasemaphandleni ukuthi bazefunda ngezokulima,” kutsho uMnu Khoza.
UMnu Khoza uqhubekele phambili njalo echaza ukuthi bafundisa njalo intsha ngezokufuya. Uthe balenkomo zochago lenkukhu zamaqanda kanye lezenyama njalo lokho kwenza abantwana bakhule belomfutho wokwenelisa ukuthi bathole izindlela zokuzisiza empilweni zabo.
“Sikhangelele ukuthi abatsha benelise ukufuya izifuyo ezitshiyeneyo njalo benelise lokuzelapha nxa zithe zagula.
Lokhu sikwenzela ukuthi njengoba imisebenzi ingasatholakali lula abantwana benelise ukuthi baziphilise,” kutsho uMnu Khoza.
Kubikwa njalo ukuthi inhlanganiso le njengeqembu elizimele lodwa kayicini ngokufundisa intsha ngezokufuya lezokulima kuphela kodwa ifundisa ngezokholo njalo njengoba iholwa ngamaKhristu.
UMnu Khoza uchaze ukuthi inhlanganiso yabo ikholelwa njalo ukuthi zonke izinto zivela kuMvelinqangi ngokunjalo kumele aphiwe ithuba lokuthi adunyiswe njalo abantwana bafunde ukuzwisisa ngokoMoya Oyingcwele yikho abakufundisayo njalo.
“Siyafundisa njalo ngezokholo abanye bengaba ngabafundisi kuChristian Centre yethu njalo intsha kuyayisiza ekutheni ingaduki ngezilingo zomhlaba yikho sazama ukuthi sihle sibaqoqe ngemfundiso yesiKhristu”, kutsho uMnu Khoza.
Uphethe ngokukhuthaza intsha ukuthi ize kundawo yabo izothola ulwazi oluzayenza ithole ithuba lokufundela ngezokulima lokufuya kanye lezesiKhristu okuzakuba ngumphako wabo wempilo.
