uMthunywa
YiNtatheli kaMthunywa
ABAQEQETSHI bomdlalo wenguqu edolobheni leGwanda lakundawo eziseduzane sebenikezwe elinye ithuba lokuthi baziphakamise ngokuthola izithupha zokuqeqetsha ezaphezulu.
Inhlanganiso yeZimbabwe Football Association isibike ukuba izimisele ukugcwalisisa isithembiso sayo sokufundisa abaqeqetshi abadlula inkulungwane ikakhulu kuhlandla lezifundo zeCaf C.
Ekhuluma loMthunywa ngoLwesbili uXolisani Gwesela obona ngezokuphuma kwembiko kuZifa uthe bayaqhubeka ngokukhuthaza abaqeqetshi ukuthi bandise ulwazi lwabo ngokukhuza imidlalo.
Uthe izifundo lezi zingaphansi kohlelo lweZifa oluzagcwala amadolobho wonke njalo bafuna lokuthi lufinyelele lasemaphandleni.
Ingcitshi kwezokulolongwa kwabaqeqetshi benguqu kubikwa kusukela ngeviki ezayo zizavula ikilasi kulabo abalesifiso sokuphatha isithupha lesi. UGibson Homela ngomunye walabo abazakhokhela lumsebenzi wokulola ingqondo zabaqeqetshi abaseMatabeleland South lakwezinye indawo.
UGwesela wengeze ngokuthi iqula lababalisi bomdlalo wenguqu lizaqina ngokuphawula ulwazi lwesithupha sikaCaf C esikolo se-St Christopher Primary, eGwanda.
“Silokuthaba ukwazisa abaqeqetshi labo bonke abafuna ukuthola isithupha sika-Caf C ukuba kuzaqhutshwa izifundo esikolo seSt Christopher njalo,” kutsho uGwesela.
Isikhulumi seZifa lesi sibike ukuba izifundo zikaCaf C zivunyelwa abaqeqetshi abaphethe isithupha seZifa Level Two kuphela.
Kuzifundo ezedluleyo, inhlanganiso yeZifa ibivumela ukuthi labo abafisa ukuphatheka kuzifundo zika-Caf C babhadale imali angange-$200.
Phezulu kwalokhu, abaqeqetshi bacetshiswa ukuthi izifundo zikaCAF B zizaqhutshwa njalo edolobheni leZvishavane ngenyanga ezayo. Izifundo zesithupha lesi zibiza i$400 egoqela ukugcinwa kwabafundi, ukudla, ingwalo lokunye.
