uMthunywa
Pumulani Mpofu
ABADALA bayatsho bethi “ithemba kalibulali” ngoba benanzelela ukubana laloba umhlaba usoma usima manzonzo kumele sihlale silethemba lokubana kuzolunga kuphela loba sekunjani. Kuqakathekile ukubana abantu bahlalele ethembeni loba inhlupho zingaze zande okungakanani.
Inengi labantu landise ukubana nxa sebethe babhujelwa badabuke kakhulu baze balibale ukubana kulekusasa elibadinga bephila njalo kumele impilo zabo ziqhubeke njengoba kuyibo asebesele bephila . Kubuhlungu sibili ukufelwa kodwa kumele ukhale ulethemba ukuze abantwana labo babe lalo ithemba ngoba ukufa kungayisikho okucinisa umhlaba. Njengoba ilifa lisabiwa ngabasaphilayo kuqakathekile ukubana sikhale siziduduza ukuze sithole amalungelo elifa labazali bethu loba elabomkethu. Ngesikhathi lapho nxa umuntu esethe wadlula izihlobo ziyahalela impahla zomufi njalo zidinge lamaqhinga okubana bathole ilifa.
Kule iviki ngithole ithuba lokuxoxisana lomfelokazi okuthiwa nguKhethiwe Mdlongwa. UKhethiwe wayethethwe ngubaba okuthiwa nguQhubekani owayevela eMberengwa. Babusiswa ngezingane ezintathu. Ekubhubheni kukaQhubekani izihlobo zakhe zabuya zivela eMberengwa ukuze bancedise ukuthatha kwencwadi yokufa ekaQhubekani. Izihlobo zaqala ukuhlupha zithi zona ngeke bancendise uKhethiwe ukuthatha incwadi yokufa (death certificate).Izihlobo zala ukumsiza bathi uQhubekani wayelesikwelede sabo ngakho ke ukuze bamncedise ukuthatha incwadi yokufa kumele abhale i-affidavit etsho ukubana izikwelede zikamufi zizabhadalwa ngokuthengisa impahla kamufi.
Emva kwalokho bamtshela ukubana umufi ubekoloda umfowabo imali engange $2 000. UKhethiwe wacela ukubona amaphepha ayiwo akhombisa ukubana umufi lomfowabo babolekana imali, kodwa akukho phepha elikhombisa lokhu njalo baqina ngokuthi eyomdeni ayingenwa.
Indlela izihlobo esezifuna ngayo leyomali sekudale ukubana kube lengxabano njalo bale ukuphatheka ekuthathiseni umufi incwadi yokufa. Lokhu kuveza sobala ukubana izihlobo ziyathanda idlelo benganakile abantwana abatshiywe ngumufi. UKhethiwe weza-ke eTrinity edinga uncedo njalo lokwelulekwa ukuze athole amalungelo akhe labantwana bakhe. Sameluleka-ke simvezela ukubana incwadi ezifana lama affidavits zibhalwa emapholiseni njalo endabeni zelifa kumele ayibhale lapho esetshelwe ngumthetho hatshi imuli. Okunye njalo samazisa ukubana yena ulelungelo lokuthathela umkakhe incwadi yokufa njalo izihlobo zomkakhe zimele zimcendise ukuze enelise ukubana ayisebenzise ukubana alungise imali zepentsheni yomkakhe. Lapho izihlobo zingala ukumsiza umthetho ulakho ukungenela ukuze athole incwadi yokufa njalo bakhangele indaba le eyesikwelede. Okuhle ngoKhethiwe yikubana ulalo ithemba lokubana kuzamlungilela enelise ukuthola ilifa lomkakhe njalo akhulise abantwana bakhe.
Kasihlanganeni njalo kuviki elizayo.
Umlobi utholakala kukheli ethi [email protected] loba kunombolo ezithi 0773165055. Laku www.trinityproject.biz
