uMthunywa
Buhlebenkosi Gaule
INTSHA yeNkulumane koBulawayo yamukele uhlelo olutsha oluzayiphathisa ukuthi ifunde imisebenzi yezandla ezakubanceda empilweni kwelizayo.
Uhlelo lolu lujonge ukuphathisa ikakhulu abatsha abatshiya isikolo kumbe abangaphumelelanga kuhle ezifundweni zabo.
Ukhansila wakulindawo uMnumzana Ernest Rafamoyo uthi usesebenze labantu abanengi ebaphathisa ngokubahlomisa ngemisebenzi yezandla. Uthe banengi abaphathisa ngalindlela kugoqela izalukazi lamaxhegu, intandane kanye labaphila lobugoga.
UMnu Rafamoyo ubikele inthatheli ukuthi uhlelo lolu abalubiza ngokuthi Youth Skills Training lwaqala nyakenye ngoMfumfu njalo beqalisa babelabatsha abahlanu kuphela ngoba besafuna ukubona ukuba uhlelo lolu lungabalakho ukuphumelela.
“Sathi siqalisa uhlelo lolu sasilabatsha abahlanu nje kuphela kodwa lonyaka sithole ukuba sesilabangu-70 okutshengisela ukuba uhlelo lwethu luyaphumelela. Abatsha laba esibaphathisayo bafunda kungelanhlawulo njalo phakathi kwabo kukhona abenza izifundo ze-plumbing, till operation, hospitality, motor mechanics, building labenza ezokunusela.
Inthatheli ikhulume loMpumelelo Ncube owenza izifundo zokwakha bathi uhlelo lolu solubaphathise kakhulu ngoba sebelezathifikethi zalezizifundo.
“Uhlelo lolu lusiphathisile ngempela nanko phela sesilezithupha zalezizifundo ngemva kokuphumelela kuzifundo zokwakha.
“Esikubongelayo yikuthi asizange sikhokhe mali ngitsho sisenza izifundo lezi nanko phela inengi vele imali asilayo. Siubonga ukhansila wethu osivumele ukufunda singakhiphanga mali lamuhla sesilakho lathi ukuthi sisebenzi sithole okokuziphilisa,” ngu Mpumelelo lo.
Omunye njalo owenze izifundo zokwakha uDaniel Mangoma uthe uhlelo lolu lulusizo olukhulu kuntsha yakulelilokitshi.
“Banengi abatsha asebethole usizo lokufundiswa imisebenzi yezandla etshiyeneyo lapha eNkulumane njalo sibonga ukhansila labanye bakhe ngokusiphathisa.
“Njengoba sesiqedile iziffundo lezi saphiwa izithupha sesilakho lathi ukuthi sisebenzise izandla zethu sithole okungasiphilisa siphinde siqale amabhizimusi azakwenza lathi siqhatshe abanye,” kutsho uDaniel.
Ngaphandle kokusebenza lentsha ukhansila Rafamoyo uthe uphathisa abanye abantu elokitshini leli ekusunguleni izivande kanye lokukhuthaza elinye iqembu labobaba ukuthi bafunde ukwakha.
