uMthunywa
YiNtatheli kaMthunywa
KANTI kutshiywa abanjani?
Lo ngumbuzo ogcwele kunengi labasekeli bomdlalo kanobhutshuzwayo beqembu lamaWarriors abacela ukuthi umqeqetshi uKalisto Pasuwa atshiye umsebenzi.
AmaWarriors ehluleke ukunqoba lomdlalo owodwa kumkhankaso weAfrican Cup of Nations. Abadlali bephule ithemba labalandeli babo abakade bethiye ukuthi iqembu lizafinyelela kuma-quarter finals lenze okungavamanga.
Kwehlule ukuthi abadlali batshengisele umhlaba ukuthi kungani bakhethwa nguPasuwa ukudlalela isizwe. Kungabe kuliphutha labadlali kumbe elomqeqetshi?
Kulandela ukukhitshwa kwamaWarriors kuAfcon ngemva kokudliwa yiTunisia 4-2 ngoMvulo, amaphephandaba kanye labalandeli bomdlalo baveze imibono etshiyeneyo.
AmaWarriors alonyaka enelise ukubamba iAlgeria 2-2 kumdlalo wakuqala, asuka lapho avuthuzwa zingcitshi zeSenegal 2-0. Iqembu leli liyangise isizwe ngokwehluleka ukunqoba lomdlalo owodwa.
NgoLwesithathu uPasuwa uphume kwelinye iphephandaba ebika ukuthi kafuni ukutshiya umsebenzi ngoba usafuna ukuzwa umbono kamaneja wakhe uGibson Mahachi. Kwelinye iphephandaba umqeqetshi ubikele isizwe ukuthi usetshiya umsebenzi.
Ngokutsho lokhu, uPasuwa utshengisele ukungathembeki, waphinda wabonakalisa ukuthi umaneja wakhe uMahachi ulesandla ekukhethweni kwabadlali besizwe.
UMthunywa uzame kanengi ukuxhumana loMahachi kodwa ucingo lwakhe belungadojwa.
Izizalwane zeZimbabwe ezisekela inguqu zithe uPasuwa uphenduke wabayinhlekisa kumbali yenguqu.
“Kumele sixotshe uPasuwa. Kufana lokuthi asilamqeqetshi ngoba phakathi kwethalenta alalo, uyehluleke ukukhetha ithimu,” kutsho uMarshal Nkomo koBulawayo.
UAdam Khosi waseNtunjambili eMatopo ubike ngokudana abakulethelwe nguPasuwa leqembu lakhe.
“Akula buhlungu obedlula lobu kunguqu. Silokudana okukhulu njalo lokukhuluma ngamaWarriors kukhweza iBP.
Abafana bethu basithathele isiwiji emlonyeni sibili. Ngemva kokudlala kuhle le-Algeria sasesithembele ukuthi sizabhaxabula ezilandelayo.
“UPasuwa kuzikhanyele ukuthi ubelabadlali abathandayo kuqembu leZimbabwe. Kungani esebenzise abadlali abafanayo imidlalo emithathu, esazi ukuthi bayaxega. UMushekwi (Nyasha) londoda ole-dread (Costa Nhamoinesu) abenzanga lutho ngaphandle kokubulalisa iqembu. Pho uPasuwa kakubonanga lokhu? Ukukhethana ngokwazana akusebenzi ebholeni. Yikho edliwe.”
Abanye abasekeli bathumele uMthunywa imbiko besithi iZimbabwe ilabadlali kodwa iswele umqeqetshi.
“Nxa sifuna ukuthi inguqu yethu iyephambili, ngithi kahambe uPasuwa. Banengi abaqeqetshi abangenza ngcono.
UKelvin Kaindu ungcono kuloPasuwa. Inhlanganiso yeZifa ayiqhatshe umqeqetshi ovela phetsheya.
Lasebulenjini abasekeli bamaWarriors bakhulume ngokuthi umuntu okumele abuzisiswe ngokunqotshwa kweZimbabwe nguPasuwa.
“Sithi kahambe uPasuwa ngoba nguye umqeqetshi. Uyazi mhlophe ukuthi nxa iqembu linqotshwa kumele kukhulunywe laye. Watshiya abadlali ababukhali emambuleni ekhetha abakhe,” kutsho uSiyabonga Madonko ohlala eGwanda.
Iphephandaba lesigodlweni iHerald, lethule udaba lapho uPasuwa athe usehlala phansi. Umqeqetshi lo ubonge isizwe lenhlanganiso yeZifa.
“Kulandela ukunqotshwa kweZimbabwe kuAfrica Cup of Nations, ngibona angathi sekumele ngitshiye umsebenzi. . . kumele ngitshiyele abanye,” kutsho uPasuwa.
