uMthunywa
YiNtatheli kaMthunywa
AMANTOMBAZANA adlala umdlalo wokuqaga ilizwe lonke asephiwe njalo ithuba lokuzitshengisela enkundleni nanko inkampani yeTanganda Tea iyaqhubeka ngokusekela umdlalo lo ngokuletha umncintiswano koBulawayo ngoLwesihlanu.
Umncintiswano lo ubizwa ngokuthi yiStella Tea Netball challenge uhlanganisa amaqembu ezikolo alitshumi amele izabelo zonke zelizwe. Imidlalo le idlalwa ngaphansi kwenhlanganiso yabaphathi eyeNational Association of Secondary Heads.
Abanqobi balumncintiswano kubikwa bazamela iZimbabwe kumhlangano wezemidlalo yezikolo zezwekazi le-Southern Africa- oweConfederation of Schools Sport Associations of Southern Africa (Cossasa).
Umongameli weNash uJohnson Madhuku uthe inhlanganiso yebo ipha isibongo esikhulu kunkampani yeTanganda Tea ngokuqhubekela phambili isekela imidlalo yesikolo.
“Okuthabisayo ngalumncintiswano weStella Tea yikuthi minyaka yonke kuvela izikolo eziphuma emaphandleni. Lokhu kuveza ukuthi nxa imidlalo yezikolo isekelwa ngokugcweleyo, abantwana abalethalenta balakho ukuphumelela.
“Thina njengeNash, sizazama ukuthi sigcine ubudlelwano bethu lenkampani le. Okunye okuthabisayo yikuthi lokhe saqala ukusebenzelana lenkampani le, sebebanengi abantwana abakhethwa ukuthi badlalele iqembu lesizwe,” kutsho uMadhuku.
Umongameli lo ubike ukuba kulamankampani aseveze ukuthi afuna ukuba yingxenye yemidlalo yezikolo.
“Kukhanya kulamankampani athembisayo ukuthi nxa imali ikhona, azasekela imidlalo yabantwana besikolo.”
Kusenjalo, kuliviki umgcinisihlalo weZimbabwe Netball Association (Zina) uLetticia Chipandu kazange athande ukuveza okunengi mayelana lokudinga usekelo lwemali kuligi ephakemeyo izwe lonke.
“Akhona amankampani asekela umdlalo ezikolo abalisa iStella Tea, elenkezo encintiswa yizabelo zonke.Ngomnyaka lo sikhangelele ukuthi umdlalo ukhule, utshintshe njalo.
Abaphathi bomdlalo koBulawayo labo bathumeze umbiko wokubonga ukuzimesela okwenziwa yiTangada Tea ngokuhlawulela umdlalo esigabeni sezikolo.
Abakhokheli be-netball bathi kade baqala ukuncenga amankampani labantu abalemali kulelidolobho kodwa inkampani yeTanganda yiyo elokhe iqina ngalumdlalo.
