uMthunywa
YiNtatheli kaMthunywa
LABO abalethalenta yokutshaya ngenqindi sebezathola amathuba amanengi ngoba umdlalo we-boxing uzaguquka kuleli.
Umdlalo we-boxing kuleli uzaphakama ngomnyaka ozayo, umqondisi wenhlanganiso yeSports and Recreation Commission uCharles Nemachena ubike ukuba yena lequla lakhe abasoke baphumule esikhundleni nxa umdlalo we-boxing kuleli ungalungisiswanga.
UNemachena ubikele iphephandaba likazulu ukuba ubethwele nzima ecabangisisa ukuthi uzawuguqula njani umdlalo wenqindi osubhidlika bekhangele.
Inhlanganiso yeSRC yachitha ibhodi yakudala yalinhlanganiso eyayikhokhelwa nguRichard Hondo ngomnyaka ophelileyo ngoba ingenzi kuhle.
Ibhodi ibisehluleka ukukhokhela imidlalo ye-boxing leye-wrestling lokhe yangena esikhundleni ngo1980.
Ukhulume lokhu eselula ukuba uselawo amabizo alabo abakhangelelwe ukukhokhela inhlanganiso yeZimbabwe Board of Wrestling and Boxing Control
“Bekungelula. Kulandela ukudiliza kwethu ikomithi endala, besingaphumuli, sizama ukuthi ilanga ngelanga siphume lezinqumo ezizanceda imidlalo yethu ye-boxing le-wrestling.
“Ngiyathokoza ngokuthi ama-stakeholders ahlangene njalo lami ngikhangelele ukuthi ngethule ibhodi le ngemva kwengxoxo esizakuba layo.
“Okuqakathekileyo yikuthi abantu kumele bacebisane ukuze kungabi lenkethabetshabi, izinto zicine zingahambi ngendlela,” kuqhuba uNemachena.
Ngokutsho kukaNemachena, abantu abakhethiweyo ngabalobungcitshi kwezobukhokheli bemidlalo.
Uthe anduba isizwe saziswe ngebhodi entsha, ukuzamele aqale abe lomhlangano lalabo abakhethiweyo.
Walile ukuqamba amabizo abantu laba wathi uzabaveza ngesikhathi esifaneleyo.
“Sengiwatholile amabizo alabo abakhethiweyo njalo ngikhangelele ukuthi ngenze umhlangano labo ukuze silungisise okunye okusasilela,” kutsho uNemachena.
Ngemva kokuchithwa kwebhodi yakudala, ugatsha lukamphathintambo wemidlalo kuHulumende lwakhuthaza inhlanganiso yeSRC ukuthi iphume lenye ibhodi ezamela i-boxing le-wrestling ngokugcweleyo.
UNemachena uthe kulandela ukungezwani okwabakhona ngokuchithwa kwebhodi, bakubona kufanele ukuthi babumbe iZimbabwe Boxing Committee.