uMthunywa
NguLungelo Ndhlovu
IZAKHAMIZI zelokitshini leNumber 2 elidume ngokuthi yiMahalape kanye leNumber 3, okuyizindlu zenkampani yeHwange Colliery, zikhala ezimathonsi ngokukhwezwa komthelo wezindlu ngesilinganiso esingaba yi-75%.
Izakhamizi ezikhulume lephephandaba likazulu zithe zimunyu ngesenzo senkampani le, ekhweze umthelo yona ingakaze ilungise izindlu zayo esezize zidilika.
Izakhamizi lezi zithe kazisiboni ngitsho isizatho esenza inkampani le ibakhwezele umthelo njengoba isehluleka ngitsho lokubakhela izambuzi ezeneleyo elokitshini labo.
UMnunzana Tiganize Mlauzi ohlala eNumber 3 ubike ukuthi izakhamizi zakuleyo ndawo sezihlalele evalweni, ngoba imiduli isidilika.
“Kasikhangelelanga ukuthi inkampani yeColliery isikhwezele umthelo ngenxa yokuthi isisehluleka ukulungisa izindlu zayo. Sesizihlalela emawobeni nje kuphela. Izindlu esihlala kuzo zingakuwela ekhanda iloba yisiphi sikhathi,” kutsho uMnu Mlauzi.
Kuzwakale ukuthi ezinye zezindlu lezi kazisela zivalo njalo abantu sebevala ngamasaka.
UNkosikazi Siphiwe Mpofu ohlala eNumber 3 uthe bona sebekhathele ngokusebenzisa isambuzi esisodwa beyizakhamizi ezinengi.
“Kuyadanisa esikubona la, isambuzi esisodwa singabe sisetshenziswa phose ngabantu abangu-100 abahlala elokitshini lethu. Kasingeke sabaleka lapha ngoba inengi lethu lisemsebenzini yikho nje sikhala sindawonye,” kutsho uNkkz Mpofu.
Izakhamizi lezi sezike zaba lomhlangano leziphathamandla zenkampani le zona ezibike ukuthi inkampani isengxakini yezimali njalo isibone kungcono ukuthi ikhweze umthelo wezindlu.
