uMthunywa
YiNtatheli kaMthunywa
IKHANSILI ebona ngokulotshwa kwemihloliso kuleli eye-Zimbabwe School Examination Council, isikhiphe imali yakuleli okumele isetshenziswe ekubhadaleni imali yemihloliso ye-Ordinary Level kunye le-Advanced Level kaLwezi.
IZimsec iveze ukuthi loba imali le ifakwe ngeyeMelika kodwa abantu bayenelisa ukubhadala ngeRTGS njalo izikolo zonke zikhangelelwe ukuthi zamukele loba yiphi imali ezasetshenziswa ukubhadala ngabazali.
Kusitatimende esikhitshwe yi-Zimsec, kubikwa iUS$1 liyi $18 981 ngemali yakuleli kusukela mhlaka 19 Mbimbitho kusiya ku 26 Mbimbitho 2024.
“Imali lezi kumele zifakwe kubhuku lebhanga leZimsec kuthi i-ZWL izikolo zixwayiswa njalo ukuthi zisebenzise ibhuku leKhansili, elise-Standard Chartered Bank Account Number 0100209057600.
Ibhodi yemihloliso le ibuye yaveza ukuthi ama-USD kunye lamaRand azafakwa ku-akhawunti yeZimsec yizikolo.
Izikolo zikhangelelwe ukuthi zifake imali le kubhuku leZimsec elisebhanga le-Standard Chartered Nostro Account Number 8740409057600.
IZimsec iphethe ngokuveza ukuthi izaqhubeka isamukela imali yemihloliso ezabhadalwa ngabazali babafundi ezikolo njengokuvezwe ngaphambilini, ngokunjalo izikolo zikhangelelwe ukuthi zibhadale imali le kukhansili injengokuba yavela kubazali.
