uMthunywa
YiNtatheli kaMthunywa
UKING Nadolo, umdlali weHighlanders uthi lonyaka iqembu leHighlanders lizakhwela phezulu kweDynamos kuyo yonke imidlalo njalo lokho kuzaqala ngeSonto mhla zombili zidibene kunkezo yeBob 92 Zifa Super Cup Emagumeni.
UMthunywa uzwe ukuba abadlali beBosso sebetshelwe kwezwakala ukuthi kumele baphinde ukudla iDynamos njengalokho abakwenza ngoMpalakazi ka2015 kunkezo yeEasyCall koBulawayo.
UNadolo uzakhunjulwa linengi lababukeli labasekeli beBosso ngokuthi nguye owabayinsika yokubhuqwa kweDembare. Umdlali wenelisa ukureyitsha phakathi laphakathi kwenkundla, okwenza kwabalula ukuthi iHighlanders ibhoboze iDynamos kalula.
Njengoba inkunzi zebhola lezi zihlangana ngeSonto, uNadolo uthe usemelele ukujabulisa abalandeli bethimu yakhe njalo.
Umdlali lo uthe yena labanye abadlali abafuni ukugcwalwa zinhloni zokunqotshwa yiDynamos ngakho kumele batshengisele ukuthi bazayinqoba okuzwayo kulisizini ngomdlalo wenkezo yeBob 92.
UNadolo nxa engakhethwa ngumqeqetshi uErol Akbay, ulakho ukukhathaza abadlali beDynamos ikakhulu isethenjwa sabo uOcean Mushure.
“Kade sezwa ngeDynamos. Umdlalo lo ufana lokuthi sesivula ngawo isizini yalonyaka ngakho siyawuqakathekisa kakhulu. Imidlalo yalisizini yehlukene kakhulu kulamasizini adluleyo. Siqala kutsha ngakho sizanqoba.”
Umdlali lo uthe abalandeli babo abakhuze uvalo ngoba kuliviki ithimu ilungiselele iDynamos okuzwayo.
“Ukunqoba phezulu kweDynamos kuzatshengisa ukuthi ithimu izimisele kulisizini. Akulathimu esifuna ukuyichumisa njengale. Idlabuzane lolunqoba liphezulu,” kutsho uNadolo eqeda ukulolonga kuliviki.
Umqeqetshi wethimu uErol Akaby uthe kuzakuba lokugedla kwamazinyo kusukela kulimpelaviki.
“Ngibona angathi ithimu isilolongile kwenela. Asithembisi lutho ngaphandle kokuthabisa abasekeli bethu. Amathimu azabona izimanga.”
