Isisebenzi sifela kumncintiswano wokugijima

23 Nov, 2023 - 00:11 0 Views
Isisebenzi sifela kumncintiswano wokugijima

uMthunywa

Innocent Kurira

KUBE lilanga elilethe usizi kwezemidlalo koBulawayo lapho uNorman Mahla, obegijimela iZimbabwe Parks and Wildlife Authority (Zimparks) kubikwa ewele phansi, eceleni komgwaqo, kwahle kwaba yikudlula kwakhe emhlabeni.

UMahla, obeleminyaka yokuzalwa engu-40, ubengomunye walabo abakade bencintisa kumjaho weCimas iGo Half-Marathon oqhutshelwe kulelidolobho ngeSonto.

Kumbiko wayo, inkampani yeCimas Health Group ithe ibika ngokuzisola langokudabuka ngokufa obekungalindelekanga kukaMahla (40), obelilunga leZimbabwe Parks and Wildlife Authority (Zimparks).

 “UMahla ubeyingxenye yeqembu leZimparks ebeligijima kumbango we-10km. Uwe duzane lomgwaqo, lapho obekulamapholisa khona. Amapholisa azamile ukumsiza ngokuphangisa njalo le-ambulensi yafika ngokuphangisa kodwa ngaleso sikhathi izisebenzi ze-ambulensi zabika ukuba usefile. Isidumbu sakhe sihanjiswe e-United Bulawayo Hospitals,” kutsho umbiko okhitshwe yinkampani yeCimas Health Group.

Isiphathamandla seCimas Health Group, uVulindlela Ndlovu, uthe yena lazo zonke izisebenzi zeCimas baphatheke kabi ngokufa kukaMahla, ikakhulukazi njengoba kwenzakale kumjaho obukhankasela impilakahle.

United Bulawayo Hospitals

“Imbangela yokufa sizakubayazi ngemva kokuhlolwa kwesidumbu. Ngimele iCimas, ngicela ukudlulisa induduzo yethu kumkakhe labantwabakhe kunye lamanye amalunga emuli. Siduduza njalo labeZimparks,” kutsho uNdlovu.

Kusenjalo, uThabo Mapfumo lo-Abigal Musarurwa batshiye bonke ngesiqubu kulumjaho.

Baphiwe imivuzo yabo enkundleni yiBulawayo Athletics Club (BAC). 

UMapfumo uqede umango we-21km lo ngehola elilodwa lemizuzu elitshumi lasithupha (1hour 16 minutes, 33 seconds). Ulandelwe nguTony Mpofu nge-1 hour 25 minutes, 28 seconds. Kunombolo yesithathu kubengu Fidelis Bhebhe oqede nge1 hour 27 minutes, 19 seconds.

Kwabesifazane, uMusarurwa udlule uModdy Chiwetu loBeatrice Mpondi abaphutshe umango belandelana kunombolo yesibili leyesithathu.

UMusarurwa utshaye intambo ngemva kwe-1 hour 47 seconds. UChiwetu uqede ngemva kwamahola amabili. Oqede kunombolo yesithathu, uMpondi uthethe amahola amabili lemizuzu engu-27.

Kubanga le-10km kwabesilisa, kunqobe u-Albanas Tshuma ngemizuzu engamatshumi ayisitshiya galombili (38 minutes, 15 seconds). U-Lineker Ndlovu ulandele ngemizuzu engamatshumi amane lesikhombisa (47 minutes,14 seconds). Kwabesifazane, kunqobe uTulange Mudenda ngemizuzu engamatshumi amane lasitshiya galombili (48 minutes, 10 seconds).

Kubikwa kugijime abantu abangu-300  koBulawayo. Inhloso yomncintiswano bekuyikukhankasela impilakahle yabesilisa lokuphakamisa ucwaningo kumkhuhlane wemvukuzane lokusekela labo abaphila lomkhuhlane lo.

Inkampani yeCimas ithe imali etholwe kulumjaho izanikezwa inhlanganiso yeCancer Association of Zimbabwe.

“Imali izanikezwa inhlanganiso yeCancer Association of Zimbabwe. Inyanga kaLwezi ihlonitshwa njengenyanga yokukhankasa ngempilakahle yabesilisa emhlabeni wonke. 

“I-Cimas inxusa wonke amadoda aleminyaka yokuzalwa engaphezulu kwe-40 ukuba bavakatshele ekilinika yeCimas eseduzane ukuze bahlolwe imvukuzane.

Share This:

Sponsored Links