uMthunywa
Francis Dhliwayo
LANXA izulu lilinengi lonyaka isivuno sabalimi esabelweni seMatabeleland North silakho ukwehla ngenxa yezibungwana ezibizwa ngokuthi yi-fall armyworm esezihlasele umumbu endaweni le.
Kubikwa imvukuzane yesibungu le iqale ukuhlupha esabelweni lesi ngeviki yokuqala kunyanga kaZibandlela.
I-fall armyworm le kubikwa ihlasela umumbu kakhulu njalo iwudla ngaphakathi ize ifike lapho okulenhliziyo yawo lokhu kucina kubangela ukuthi umumbu ucine ubuna ungasakhulanga.
Iphephandaba likazulu lixhumane lomunye umlimi weMguza uNkosazana Priscilla Dube oveze ukuthi balesithuli ngendlela izilimo zabo esezihlaselwe ngayo yi-armyworm ikanti besikhangelele isivuno esikhulu lonyaka njengoba izulu lilinengi lonyaka.
UNkosazana Priscilla Dube uveze ukuthi sebezame ukufafaza imithi efana le-carabyl lokufafaza umlotha emasimini abo kodwa imizamo yabo ayilethanga impumela ngoba i-fall armyworm le ayifani lamanye ama-worms ayiwo avame ukuba khona ngesikhathi sezulu, uthe yena lawa ahlukile ngoba awabulaleki kalula njalo anda nsukuzonke.
UMnumzana Dumisani Nyoni onguProvincial Agricultural Officer kunhlanganiso yeAgritex exoxisana lentatheli kaMthunywa ukhuthaze abalimi ukuthi bahlole insimu zabo kabili kumbe kathathu ngelanga ngoba i-fall armyworm le ekhona idla njengemvukuzane.
“I-fall armyworm ifana xathu lemvukuzane ngoba idla isilimo phakathi. Balimi ngiyazi ukuthi izulu linengi njalo kunzima ukuthi liye emasimini kukanti abanye benu lanxa bengena emasimini bahlola izilimo bekhatshana kodwa-ke lokhu kakuncedi ngoba izilimo ziyabe zidliwa zisifa,” kutsho uMnu Nyoni.
UMnu Nyoni uqhubekele phambili esithi abalimi nxa kukhona abangakuzwisisiyo ngezilimo zabo baphange babikele abalimisi abaseduzane labo ukuze babaxwayise ngemithi abangayisebenzisa ukulwisa lobobudli.
UMnu Nyoni uphethe ngokuthi abalimi kumele bahlole ngaphakhathi komumbu ngokwephula ihlanga lomumbu baliqamule ukuze babone ngaphakathi kwawo umumbu ngoba i-fall armyworm le icatsha enhliziyweni yomumbu yikho nje abalimi kumele basondele phansi kwezilimo ukuze bazihlole kuhle beseduzane.
