uMthunywa
Msilisi Dube
KULENINA lePlumtree elazalwa lingaboni emehlweni osekuzwakale ukuthi lakhulekelwa ngomunye umphurofethi wakoBulawayo amehlo alo avuleka aqala ukubona.
UNkosazana Cynthia Khulumo oleminyaka yokuzalwa engu-38 kubikwa wazalwa engaboni njalo kucatshangelwa ukuthi unina waphoswa ngesikhathi ezithwele.
UMthunywa uzwe ukuba inina leli livakatshele ebandleni le House of Prayer International Family lapho elithe ngemva kokukhulekelwa ngumphurofethi webandla leli lamangala amehlo alo esebona.
Inina leli kubikwa lakhulekelwa ngomunye umphurofethi lamangala amehlo alo evuleka, selibona okwakuqala ngemva kweminyaka engu-38.
UNkosazana Khulumo utshele uMthunywa ecingweni ukuba uselamaviki amabili ebona kulandela ukukhulekelwa kwakhe.
“Nganxuswa eGoli ngudadewethu ukuze ngihlale laye njengoba ngangingaselaye ongincedisayo ngekhaya nanko phela umama wayesanda kutshona ngingazi ukuthi ungibizela ukuthi ngiyeqala impilo entsha.
“Ngikhonale savakatshela kwelinye ibandla elibizwa ngokuthi yiHouse of Prayer International Family.
“Umphurofethi wathi eqeda intshumayelo wasesithi abagulayo basondele phambili lami ngahamba.
“Wangikhulekela wasengihlikihla emehlweni ngelembu ayelithwele ngahle ngezwa amehlo ami evuleka kancane ngathi ngiyathalaza ngabona umuntu owayeseceleni kwami. Ngeqa ngihlaba umkhosi ngisithi sengibona okwenza ibandla lonke lathi lothu lifuna ukubona ukuthi ngeqiniso ngasengibona,” kulandisa uNkszn Khulumo.
UNkszn Khulumo uqhubekele phambili walandisela uMthunywa ngembali yakhe esithi wakhula engaboni njalo engenelisi ukudlala labanye. Uthe indlebe zakhe lazo zazingezwa kuhle kodwa khathesi usesizwa.
“Mina ngazalwa ngingaboni njalo lendlebe zami zazingezwa kuhle. Khathesi sengibona kuhle njalo sengisizwa lendlebeni. Ngasengizame ukuya kubaphurofethi abanengi ngesikhathi ngisekhaya ePlumtree kodwa kwehlula.
“Ngithanda ukubonga iNkosi kanye lomphurofethi Dube ngesimanga engasenzelwayo ngoba khathesi impilo yami isitshintshile. Kazange angibhadalise lutho ngakho wangikhulekela mahala,” kuphetha uNkszn Khulumo.
Umphurofethi lo uMnumzana Mduduzi Dube uthe inina leli lalivaleke amehlo kusukela lizalwa.
“Ngangenze umhlangano wokukhulekela abagulayo eGoli. Ngabiza bonke abaphethwe yizifo ezitshiyeneyo ngakho inina leli laselisukuma. Ngalihlikihla amehlo ngelembu engangiliphethe ngakho laqala ukubona kodwa lalibonela khatshana.
“Ngemva kwesikhatshana laqala ukuhlaba umkhosi selisithi selibona. Inina leli lalithwele nzima ngoba lalihamba ngodondolo njalo libanjiwe. Umkhuleko ulamandla. Okwami yikukhuleka kuphela, nxa lowo okhulekelwayo ekholwa uyasila,” kuchasisa lumprofethi.
