uMthunywa
YiNtatheli kaMthunywa
IZAKHAMIZI zakoBulawayo sezihlasele ikhansili yazo ngokuloba incwadi zisethesa umanisipala wokwekela inkundla zemidlalo efana lethenisi zibhidlika, ikakhulu emalokitshini.
UMthunywa uzwe ukuba kulehlekana lezakhamizi elizimisele ukuvuselela imidlalo eyayidumile kudala njalo kubikwa izakhamizi lezi seziqalile ukuhluphana lekhansili zifuna ukuzwisisa isizatho sokubhidlika kwenkundla.
Ukukhonona ngesimo salumdlalo kuze kulandela ukuthi idolobho lakoBulawayo alisela abadlali abakhethwa ukuyamela isizwe kumidlalo yaphezulu.
Phezu kwalokhu, inkundla lazo sezidilika ngenxa yokungasetshenziswa.
KoBulawayo imidlalo elenkundla ezicacayo yinguqu, ibasketball lekhilikithi kuphela. Imidlalo ebalisa ukuqaga lokugijima incedwe yikwakhiwa kwenkundla yeWhite City kakutsha, ngesikhathi kulungiselelwa imidlalo yeAfrican Union Sports Council.
Iphephandaba likazulu lithintane losodolobho uMartin Moyo obike ukuba iwofisi yakhe ayikezwa lutho ngesikhalazo sezakhamizi kodwa bayazi ukuthi isimo senkundla zemidlalo simi kanjani.
“Ikhansili ilomthwalo omkhulu wokuvuselela okunengi koBulawayo. Sihlezi sisazi ukuthi inkundla zemidlalo ezisetshenziswa nguzulu sikusimo esibi. Lokho asikwali kodwa izakhamizi azinanzelele ukuthi ibhajethi yethi iyafinyela.
“Imisebenzi kazulu yiyo esingayo, nxa kuvuleka sizaphosela lokho esilakho sivuselele inkundla lezi. Okunye okungenza kube lula yikuthi izakhamizi zisebenze lathi hatshi ukudonselana,” kutsho usodolobho.
Abazali labaqeqetshi babonisane indlela yokuthi babuzisise ngokwenzakala kwezemidlalo wethenisi kontuthu ngoba umdlalo lo usudlalelwa kuzikolo ezibiza imali kuphela, kukanti lasemalokitshini kulenkundla zalumdlalo.
Ekhuluma loMthunywa kuliviki uZeb Mawisire ongumqeqetshi uthe umlandu wokuvuselela ithenisi ukubazali abalabantwana abangabadlali.
“Nxa sizimisele ukuthi siphendukise ithenisi kumele abaqeqetshi labazali baphakame, kube lokubambana.Banengi abadlali abalesiphiwo sokudlala ithenisi koBulawayo.Uhlupho yikuthi abalasekelo.
“Abazali bengasebenzelana lathi kuzakuba lula ukuthi sincedisane lomdlalo wethu ubuyele esimeni sawo,” kutsho uMawisire ongumzali wabadlali bodumo uFadzai lo Vimbai.
UMichael Msimanga ongumzali uthe: “Okwenza ithenisi iqhube nzima yikuthi ngumdlalo odulayo. Loba ngilabantwana ababili kulumdlalo akulula ukuthi ngibangenise emncintiswaneni bonke. Labanye abazali labaqeqetshi babhekane lodubo olufanayo.
“Inyathelo lokuthi abazali, ababalisi labaqeqetshi baphathisane lizatshintsha umdlalo lo, abantwana bakoBulawayo labo babonakale.”
KoBulawayo abadlali abakhona, abathembisayo yilabo abasacathula kodwa bezingcitshi abaleminyaka yokuzalwa esuka kwelitshumi kusiya ku-18.
Emalokitshini kulenkundla ezingasetshenziswayo ezakhiwa yikhansili ezibalisa lezo ezisesikolo seMthombowesizwe primary, eMakhandeni laseSizinda.
Omunye umqeqetshi uJoelson ubike ukuba kusemhlweni zabo ukuthi abadlali bakoBulawayo baye ncintisa lengcitshi ezivela kumazwe abalisa iBotswana leZambia.
“Kuyathabisa ukuthi labazali sebebona ukuba kumele siphakamise ezemidlalo koBulawayo. Kuminyaka elandelayo sifuna ukuthi abadlali bethu bayekwamanye amazwe ukuze bathole ulwazi.”
