uMthunywa
INJABULO iphenduke izinyembezi kunina womfana otshaywe ngumbane lomngane wakhe ongumakhelwane bedlala ibhola ngoMvulo kuyonale iviki.
UNkosazana Mavis Nzuza, wesigodi seWeni, eDukuduku, eMtubatuba, eSouth Africa ongunina kaMusawenkosi Khetha Gina (14), uthi asisoze sasuka isithombe efica indodana yakhe isithe daca phansi ithule ekubeni ubesajabulela ukuthi iphasile.
UKhetha, obefunda uGrade 8 eVezobala High, utshaywa ngumbane nje ubesanda kubuya lezindaba ezimnandi ekhaya zokuthi uphasile, usesiya kuGrade 9.
Musawenkosi Khetha Gina
UNkszn Nzuza uthe uKhetha loLindelani Gumede wakomakhelwane batshona nje bebeyodlala ibhola labanye abentanga yabo kodwa izulu lakhetha bona phakathi kwabantwana abanengi.
“Bekulizulu nje ebelibukeka lijwayelekile kodwa ngathuka uma kungena umbane wokuqala, kwaphinde kwangena owesibili, ngathi asilungiselele ukukhuleka.
Ngihle ngezwa ngenye yezingane ingimemeza ingasakwazi lokuchaza kahle yakhomba ngezandla.
Ngafika esethule nje kungasekho lendawo eyodwa enyakazayo, belimele bebabili lengane yakomamakhelwane,” kutsho uNkszn Nzuza.
Eqhuba uNkszn Nzuza uthe lalamuhla uphambene nje ikhanda ngoba kazi ukuthi kumele athatheni ahlanganise lani njengoba lobaba kaKhetha njengoba sowatshona.
Izinto abona ukuthi zizamsinda kakhulu yitende lokudla ngoba akalayo imali lemizamo azama ukuyenza ayihlangani.
Unina kaLindelani, uNkosikazi Siza Gumede, ukuqinisekisile ukudlula kwendodana yakhe kulesi sehlakalo kodwa wangakwazi ukwenaba ngenxa yokuba matasa ngamalungiselelo okuyifihla.
Imizamo yokuthola elinye ilunga lomdeni ayiphumelelanga.
UMnumzana Mandla Gumede, onguMqondisi wenhlanganiso engenzi nzuzo, Isoledukuduku, esiza emphakathini, uthe benza konke okusemandleni ukutholela imideni le yomibili usizo.
UGumede uthe lesi sehlakalo sehle ngesikhathi esinzima abantu belahlekelwe layimisebenzi okwenze basukuma bayongqongqoza ezindaweni ezehlukeneyo.
“Sihambele abangcwabi abehlukeneyo bathembisa ukusiphendula ngoLwesine singazi ukuthi kuzolunga yini.
Inhlanganiso yethu ifinqeke amandla ngoba asilalo uxhaso, sizama usizo ngesilakho.
Okumele ukuqaphele uma kuduma izulu
— Ungalokothi ucatshe ngezihlahla noma ukhosele ngaphansi kwazo ngoba ziyingozi ziwudonsa kalula umbani.
— Ungacatshi ngaphansi komthunzi olezinsimbi.
— Unganyakazisi umzimba kakhulu ngokuzivocavoca, ukugijima lokunye okuzakwenza igazi lakho lifudumale ngokwedlulisileyo.
— Ungangeni emanzini uthi uyabhukutsha noma uyageza ngesikhathi sekuduma izulu.
— Hlala ndawonye endlini kodwa ungavali kuze kutshise ngokwedlulisileyo.
— Uma sekukude ekhaya, ungasebenzisa imoto ukuquba okwesikhatshana ngoba iphephile kulezihlahla, kulezinsimbi ezitholakala emotweni ezikwazi ukulawula umbani. Okumele ukuqaphele yikuthi aweyami ezivalweni zemota noma ubambelele kuzo ngesikhathi kuduma.
— Uma ungaphakathi endlini, khipha izintambo zikagesi kuzo zonke izinto ezisebenza ngamagetsi okubalisa umabonakude, iselula, isitofu, ifriji lokunye okungadonsa umbani.
— Qoqa inyamazana uzivalele okubalisa omangoye, izinja lezinkukhu bese ususa amanzi eduze lazo — ulwazi luthathwe ku-www.miway.co.za-Isolezwe
