uMthunywa
YiNtatheli kaMthunywa
ABAHLALI besigaba sikaWadi 15 emaphandleni aseGwanda babike ukuba bacabangela ukuthi amasela atshontsha izifuyo zabo asebenzelana lezinye izakhamuzi ezingomakhelwane esigabeni.
Ukutshontshwa kwezifuyo ezibalisa imbuzi, inkomo labobabhemi sekubhahile kulindawo, njalo sekutshiye inengi lezakhamuzi zikhala ezimathonsi.
Izakhamizi zakuWadi 15 zixhumane lentatheli yephephandaba likazulu ngoMvulo zabika ukuthi sezinanzelele ukuba amasela asebenza ndawonye labanye abahlala esigabeni.
Okulusizi, ngokutsho kwezakhamuzi, yikuba loba engabotshwa ngamapholisa, amasela la, abonakala esezula zula futhi esigabeni.
Izakhamuzi zithe amasela la adelela okwedlulisileyo okokuthi ayaqilibezela lamapholisa, kube lula ukuthi baphindele ezibayeni ebusuku.
Sikhona isakhamuzi esilandise ngokuthi sabophisa amasela ayetshontshe izifuyo, udaba lwayafika emthethwandaba kodwa akulanto eyaphumayo.
“Ngacina ngibona ukuthi angitholi lutho ngokuhlala ngitshitshela emthethwandaba. Icala lisegcekeni kodwa akulampumela esuthisekayo malanga wonke,” kutsho uMnumzana Gilen Nare ohlala kulindawo, ochatheke udaba.
“Ngabe umthetho uyasivumela njengesigaba kubekhona amapholisa ahlala esigabeni azakwenza umsebenzi ngeqiniso. Nxa kulondiwe, kubanjwe amasela la ajeziswe ngokufaneleyo ukuze angaphindi futhi.
“Okunye njalo osokuvamile yikuba kuyatholakala ontanga abancane belezifuyo ezigoqela obabhemi, inkomo ezingaziwayo, bengazange babonakale bezisebenzela okutsho ukuba kukhona okutshaya amanzi.”
Kubikwa ngeviki edluleyo, izakhamizi zibuthene zaxoxa ngodaba lwezifuyo ezihambayo, kwabekwa iqhinga lokuthi kungcono bazenzele umkhankaso njengoba imihla lamalanga aweviki kufanele izibaya zisale zingelalutho.
Omunye wezakhamizi uthe ubona kungcono kuvalwe indaba zamashowa embuzi ikakhulu endaweni yaseNhwali ngoba kulapho abazithola khona sezithengisiwe kumbe zivalelwe.
