uMthunywa
Thokozile Mbedzi
ZILOKHU zitshwaqe imizimba izakhamizi zesigabeni seBota eZaka esabelweni seMasvingo ngemva kokuba abafundi ababili befe ngemva kokutshaywa ngumbane kuviki ephelileyo.
Abafundi ababili abakuGrade 5 besikolo seDawa Primary School bathi bephuma esikolo izulu laqala ukuna basebecatsha ngaphansi kwesihlahla esiseduze lesikolo lapho abatshaywe khona lizulu.
Ekhuluma lentatheli kaMthunywa uMerilyn Sibanda uthe bekulizulu nje ebelibukeka lijwayelekile kodwa wethuka sekutshaya umbane.
uInspector Kudakwashe Dhewa
“Abantwana bathe besanda nje ukuphuma esikolo izulu laqala ukuna. Besebehambe nje isibanga esingaba yi-300m. Bebona ukuthi sebenethwa abantwana laba kukhanya bacabanga ukuthi bacatshe ngaphansi kwesihlahla. Yikho lapho okutshaye khona umbane wabaphosela le.
“Umphathisikolo esizwa ukuba kulabafundi asebetshaywe lizulu wathatha imota yakhe wabathwala waya labo ekilinika yeChikomba lapho abafika khona bazama ngazo zonke indlela ukubancedisa kodwa ngokusweleka kwenhlanhla bedlula emhlabeni abantwana laba,” kulandisa uNkszn Sibanda.
Isikhulumi samapholisa esabelweni seMasvingo uInspector Kudakwashe Dhewa uqinisekise ngesehlakalo lesi esenzakale kuviki edluleyo.
“Samukele umbiko wabafundi ababili besikolo seDawa abatshaywe ngumbane bafa ngesikhathi bevela esikolo.
“Sixwayisa abazali, ababalisi lozulu nje jikelele ukuthi abone ukuba balomlandu wokufundisa abantwana ukuthi bangaze bacatshela izulu ngaphansi kwezihlahla ngoba kuyingozi.
“Sixwayisa ababalisi ukuthi nxa bebona izulu lithwala bahle bakhulule abantwana baye emakhaya kumbe nxa selisina bame ukubatshayisisa ukuze bavikele ingozi ezifana lalezi,” kuphetha uInsp Dhewa.
