uMthunywa
Johas Moyo
IZAKHAMIZI zeNtumbane koBulawayo zivuke ubhejane zahlasela esinye isakhamuzi sakulelilokitshi zisisola ngokuthengisela abantwabazo izidakamizwa, uMthunywa uyakuveza lokhu.
UNonhlanhla Hadebe ohlala ku-30002/27 eNtumbane uhlaselwe yizakhamizi zakule indawo ngamatshe esendlini yakhe zimsola ngokuthengisa izidakamizwa ezigoqela amaphilisi awaziwa kakhulu ngokuthi Dayipapa, ingoma kanye lembanje.
UMthunywa uzwe njalo ukuthi izakhamizi sezisola ngitsho lendlela amapholisa enza ngayo umsebenzi wawo ngoba phela kukhanya sengathi uHadebe kabasambophi ngoba befumbathiswa okuthile bamtshiye nje eqhubeka “ngebhizimusi” yakhe le.
Esinye isakhamuzi esithande ukwaziwa ngokuthi nguMnumzana Charles nje kuphela ohlala kuD37 elokitshini leli ubikele intatheli ukuthi wakhitshwa nguHadebe kulelibhizimusi.
“Mina kangisathengisi lokhu sengakhitshwa kulumdlalo nguMaHadebe njengoba yena esazakala njalo labomthetho bakhanya badla laye yikho engasabotshwa, lendlini yakhe kuhlala kuvaliwe okutshengisa ukuthi uyakwazi ukuthi akwenzayo akukho emthethweni njalo iphilisi lakhe lidaka umuntu aze azikhohlwe,” kutsho uCharles.
Omunye njalo umakhelwane uMnumzana Thomas Gurajena uthe sebekhathele njengezakhamizi ukubona abantwababo bephaquza imbanje lezinye izidakamizwa njalonje.
“UMaHadebe yitshefu, kasimfuni lapha ngoba kulabafana abathenga kuye izidakamizwa abathi banganatha ingoma yabo le baphenduka inhlanya njalo bayahlupha okumangalisayo,” kutsho uMnu Gurajena.
Esinye isakhamuzi esixoxe loMthunywa kodwa esingathandanga ukuqanjwa ngebizo siveze ukuthi ikusasa labantwabazo libuvilibana ngenxa yezidakamizwa.
“Umama lo sesihluphile mpela lapha, abantwabethu kabasela ndaba ngitsho lokunengi empilweni zabo ngaphandle kwezidakamizwa zolezi abazithengiselwayo.
“Isimanga yikuthi lamapholisa kambophi kodwa konke akwenzayo akukho ngitsho emthethweni, mhlawumbe uyabafumbathisa,” kutsho isakhamuzi lesi. Intatheli yenelisa ukuxhumana lomsolwa uNkszn Hadebe yena ovumileyo konke okutshiwo ngabantu njalo wathi yena kudala waqalisa ibhizimusi lakhe leli njalo uphila ngalo, omakhelwane yibo abalomhawu ngoba bembona esutha njalo ethengelwa kakhulu ukwedlula bona.
“Ngaqalisa kudala ibhizimusi leli njalo sengizaze ngitshiyele abanye, ngihlutshwa ngomakhelwane abalomhawu lokuthengelwa kwami kanti njalo amapholisa asemanengi afuna ukuthi ngiwafumbathise kodwa akula lami engingakwenza kusafanele ngifundise abantwana njalo ngibone ukuthi ngiyadla.
“Khathesi ngilomntwana ofuna ukuhlinzwa (operation), lokhu kungezinye zezizatho ezenza ngithengise izidakamizwa kodwa kangithengisi ngedwa bakhona abanye,” kutsho uHadebe.
Wengezelele wathi uke wabotshwa kodwa bamkhulula ngemva kokukhulumisana lamapholisa.
“Ngike ngabotshwa kodwa bangekela sengikhulumisane labo, iviki ephelileyo omakhelwane bake bangijikijela ngamatshe bengithethisa ngenhlamba ezesabekayo yikho nje sengihlala ngizivalele ngoba abantu balomona ngebhizimusi yami, njalo balakho lokungitshisela kumbe ukungibulalela endlini,” kutsho uNkszn Hadebe.
