uMthunywa
Johas Moyo
NGENXA yokuthanda ezifela emlonyeni kulenina lelokitshini leLuveve koBulawayo okubikwa seliphendule umntanalo okhubazekileyo isichaka socansi nanko phela lidinga isilisa sokuya emacansini laye ukuze lithenge ukudla.
UMthunywa uyakuveza egcekeni lamhlanje ukuthi uAlice Nyakai ohlala ku-868 eOld Luveve usevuse ulaka lwezakhamizi zakulelilokitshi ngenxa yezenzo zakhe kulandela ukuhlukuluza indodakazi yakhe ephila lobugoga.
Kucatshangelwa ukuba uKudzai Rwodzi (26) usephila legcikwane lengculazi ngenxa yokuhlangana lesilisa esehlukeneyo asidingelwa ngunina ngenxa yokuthanda ezifela emlonyeni.
Omakhelwane abakhulume lephephandaba likazulu baveze ukuthi isiphatho senina leli kundodakazi yalo asilunganga nanko phela kuyonale inyanga iphenduke esibhedlela.
“Selokhu ngathwetshulwa yingwe kangikaze ngibone owesifazana ohlukuluza indodakazi yakhe ngendlela enziwa nguNyakai. Umuntu angathi umntanakhe ephila lobugoga aphinde amenze isichaka socansi ukuze athole imali.
“Ngikhuluma nje uke wamtshaya waze wayathungwa esibhedlela ngoba emthola engekho ebuye lamadoda endlini,” kutsho uMnumzana Philisani Mthombeni.
Uqhubekele phambili wathi ngaphandle kokuhlukuluza indodakazi yakhe ngocansi uNyakai uyamtshaya futhi.
Wengezelele wathi bacabangela ukuba ukumdingela amadoda lokhu sokubangele ukuthi abe lemikhuhlane esthiyeneyo ethelelwana emacansini.
“Umntwana lo uke welatshwa umkhuhlane wesiki, khathesi angabe eselemikhuhlane ethelelwana amacansini kugoqela owakulezinsuku,” kutsho uMnu Mthombeni.
Omunye njalo umakhelwane okhulume loMthunywa ongathandanga ukuqanjwa ngebizo uthe okwenziwa nguNyakai kuyisithuko kwabesifazane.
“Angikaze ngibone umama othanda imali ukwedlula impilo yomntanakhe. Kambe nxa ezathengisa umntanakhe ngoba efuna imali nje kuyabe kusitshoni.
“Sokulesikhathi eside umama lo ehlukuluza indodakazi yakhe njalo sesike sazama ukukhulumisana laye kodwa kalaleli,” ngumakhelwane lo echasisa ngesenzo sikaNyakai.
Iphephandaba likaZulu lixoxe lomahlukuluzwa uKudzai wavuma ukuthi unina uyamhlukuluza njalo uhlala emtshaya.
“Umama ulomoya wesikhova uhlala engitshaya njalonje kodwa ebantwini uzenza ongithandayo yena uzithandela amadrink letshukela okubuya labesilisa abadlala lami”.
“Ensukwini ezisanda kudlula ungitshaye waze wangilimaza ngaze ngayathungwa izititshi engikhahlele ngesicathulo esicijileyo. Esibhedelela wafika waqamba amanga wathi ngiwile,” kutsho uKudzai.
UMthunywa uphinde waxoxisana lonina kaKudzai ophike wemba phansi ukuthi uhlukuluza indodakazi yakhe.
“Ukumtshaya ngamtshaya sibili ngoba ngangimthole engekho endlini njalo ngokumazi kwami wayeyedinga amadoda.
“Ngamtshaya ngoba ngimthanda, ngizama ukumvikela ekuhlukuluzweni.
“Umntwana lo uthanda isilisa okuyinto engikhathazayo kakhulu empilweni yami. Ngangimkhuza engalaleli yikho ngaze ngamlimaza ngesicathulo ingasese yavuza igazi. Abantu bangibona njengomama ongalunganga noma bengazake bangene bebone uhlupho engihlala lalo ngalomntwana lokungezwa kwakhe,” nguNyakai lo.
Uthe uKudzai uhamba etshela abantu amanga ethi uyamhlukuluza nguye omdingela isilisa.
UMthunywa uxhumane loKhansila wakuleyondawo uNkosikazi Tomani Moyo yena obike ukuthi indaba le ifikile endlebeni zakhe.
“Indaba yokuhlukuluzwa kukaKudzai sengiyizwile njalo ngikhangelele ukusebenzelana lamapholisa ukuze sicazulule udaba lolu oluhlasimulisa umzimba kangaka,” kutsho uKhansila uMoyo.
