uMthunywa
Trevor Mhlanga
UYAYAZI indatshana kaMvundla loNteletsha, kodwa mhlawumbe ongakwaziyo yikuthi lindaba kayiqalisanga ngokuphekana kwabo, yaqala ngobungane.
UNteletsha wayesazi isimilo sikaMvundla, ezwile ngemithanathana yakhe ebuthanathaneni wangagqize qhakala.
Wayelobufakazi obubambekayo ngoba wayekhona mzwana uMpala efela amafufu njengegundwane, kunguMvundla omphosele inyoka ephilayo, kungasi lokho kodwa.
Wayezazi izigigaba zikaMvundla koNdwangu, lobuqili bakhe okuyisona sizatho izinja zazingabonani laye, futhi esazi kungani iNyathi ingaqubuka ngenzondo ngokuthi tshazi uMvundla.
UNteletsha wakutshaya indiva konke lokhu ngoba ecabanga ukuthi okwenziwa kwabanye kwakungezake kwenziwe kuye. Wayengazi ukuba uzimbela elakhe igodi ngokuthemba isigelekeqe.
Kulokuhlanganyela bani ukukhanya lobunyama, nxa kuyikuthi uqinisile ukuthi ungumuntu olungileyo, kungani uchitha isikhathi sakho lalowaya muntu olebizo ngesinyeyo?
Ngxoxo bani oyixoxa lesigebenga wena ungayisiso? Kangitsho ukuba sokumele uqale ukwenyanya abanye abantu kumbe ubaninele khatshana, kodwa akungabi nguwe okhanya usungamathe lolimi lomuntu olesimilo esinxele.
Ubudlelwano obunjalo buyasingcolisa isimilo sakho lanxa ungonanga lutho, njengoba kutshiwo; ohamba lamasela, lisela njalo inyoni ezilokukhala okufanayo ziphapha ndawonye.
UNteletsha engabe engaqilanga lasibungu, kodwa wazisondeza kuMvundla wangamkhuzi kulokhu ayekwenza kwaze kwafika ithuba lokuthi kube nguye inyamazana yakhe.
Inhliziyo iyakhohlisa kulazo zonke izitho zomzimba ikakhulu nxa ingqondo ingathandi ukwamukela okuliqiniso elisobala.
Nangu ebamba isithembiso samanga ezingenisa phakathi komjibila ngoba engathandi ukwamukela ukuba uMvundla kathembekanga.
Kazange athikaze ukuvuma icebo lokuphekana, engazi ukuba nguye kuphela ozaphekwa. Kunanzelele ukuba impilo akusi nto ongadlala ngayo amakhasi, uzifaka engozini ngoba nxa ingaphela akula ntengo yokuthola eyinye.
Umuntu ongathembekanga, ngaze ebe seduze kanganani kuwe ngezake umfake esilingweni sokumthemba ngempilo yakho.
Wazokhela amalahle ekhanda uNteletsha ngokuthemba iqili elinguMvundla, ekucineni ithambo lakhe laphendulwa laba lichacho likaMvundla.
Kulento eyodwa uNteletsha angayicabangisisanga, mhlawumbe lawe ongakayinanzeleli; nxa kuyikuthi uMvundla loNteletsha babedlala umdlalo wokuphekana, kutsho ukuthi omunye wabo kwakumele afe.
Zifake ezicathulweni zikaMvundla, wawungavuma ukudliwa nguNteletsha okumgceke ukuba wayelalise inkophe kulumdlalo?
Lanxa wayengumngane oqotho kwakungavumi ukuba amvulele ebhodweni uNteletsha ngoba lokhu kwakusitsho ukubuyela kwakhe phakathi kwaxathulayo.
Wonke umuntu ulemvumo yokuzifunela okwakhe ukusila, kwazi lokho ukuba nxa sekusiza ezikhathini ezinzima kakho ongazimisela ukusiza wena esikhundleni seyakhe impilo. Laba yilo leli iphutha likaNteletsha!
Thintana loTrevor Mhlanga kunombolo zikamakhal’ ekhukhwini ezithi: +263775523605 kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
