uMthunywa
Silo Trevor Mhlanga
ABANTU abaphila lobugoga, baphiwa amabizo amanengi abehlisayo, abenza beyiseke bangabi ngabantu balutho. Lokhu ngilethuba lokuloba lezi zilobo zomdladla, vuma ngibaphe isibaluli esitsha ngibabize ngokuthi ngabantu abakhubazekileyo. Lokhu kutsho ukuthi bayingxenye kazulu ngoba sonke sikhubazekile ngendlela ezehlukeneyo, ezibonakalayo kumbe ezisithekileyo. Namhla ngikhethe ukukhuluma ngabakhubazeke emehlweni, abavame ukubizwa ngokuthi yiziphofu. Kunengi esingakufunda kuleliqula labantu ngoba lanxa bengaboni okubonwa ngu wonke wonke, inengi labo libona izinto amawabawaba azitshaya indiva. Usowethu uNkwenkwezi wangenza ngakunanzelela lokhu loluya suku ngethekele eManxeleni.
Nxa sekuhlwile kuba lomnyama othandela umzimba wonke, kuhle kuthi dlwe ukuthi usuphumile koBulawayo. Indledlana ziqale ukufiphala, amagceke aphenduke amasimu okuzika kokuhlwa. Intambo ebotshelwe ehlahleni ithi mfi enqagaleni uzwe unyawo lukusinda nxa uluphakamisa kucace ukuthi ukhona umthwalo okudonsela phansi lanxa ungawuboni. Kusenjalo uNkwenkwezi uthe ntshobe isandla sakhe engalweni ngangapha kwendololwane, zisitsha ezomsebenzi, ezothando, ezemidlalo, lezenkolo, kakuthi thi kuye ukuthi isikhathi sesidliwe ngumangoye. Nxa ubungabamba esami isifuba, ubungathi mhlawumbe inhliziyo idinga intuba yokufohla ibaleke. Esengikuzwa lapha yikho lokhuya okwenzakala kuwe nxa usiyahlola igazi. “Mehl’ amhlophe,” lezwakala ilizwi lika MaMgutshini umakhelwane oseduze ehwabha, okungabafana sokulahle inkomo.
Ukuwa kweyinye indoda yikuvuka kweyinye. Ukutshingelwa kwabafana benkomo kwaba yisibusiso, ngoba indlela yokuya ekhaya yahle yazakala ngenxa yabo. Indaba kayiqedwangwa yikufika ekhaya, kwakung’khona iqala. Ingqondo leya yokuthi uNkwenkwezi ngeke aphathise ngoba engaboni yayingiphethe, ngisazikhathaza ngokuthi ngiyaqala ngaphi ukusebenza emnyameni ongaka, yena wayesephunyukile engalweni zami, lapho ngisithi ngiyaphumputha emsamo wezwakala eseklwebha umentshisi. Kwaba ngumzuzu lapho engabona khona ukuthi bengingaboni sonke lesi sikhathi. Umuntu ongephathise emnyameni yimi, uNkwenkwezi uyayazi yonke indawo la ekhaya, njalo uyenelisa ukwenza loba yini, uklwebha umentshisi nje, ubanekisa ikhandlela lokuqala.
Nxa okhubazeke endlebeni evula umsakazo kazenzeli yena, kodwa labo abalaye ukuba bazilibazise ngawo. Yiyo leyo ndlela aveza ngayo ukuthi lanxa engezwa ulimi olukhulunywayo uyazwisisa ukuba umuntu ulemizwa njalo ulolangatho lokuzwa okuhlabusayo lokwenzakalayo; lokhu yikho okumenza anake ngezinga eliphakemeyo aze avule umsakazo. UNkwenkwezi wangivula amehlo mzwanokhwa, wabanekisa ikhandlela ukuze axotshe umnyama, hatshi ngoba lumnyama wawumkhathaza, kodwa ngoba wawungihlukuluza ungenza ngehluleke ukusebenza. Kuyathithibalisa ukukucabanga lokhu ngoba njengawe ngangithi ngimkhangele ngibone isiphofu, kodwa loluya suku ngasizwa yiso “isiphofu esilamakhandlela!”
Thintana loTrevor Mhlanga kunombolo zikamakhal’ ekhukhwini ezithi: +263775523605 kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
