uMthunywa
INALA kayidumi, kuduma indlala, idili lomthimba liphela mzwanokho kodwa isililo singayivala iviki. Indaba zobuthakathi, ubunja, lobukliwi ziyakhitshwa kumaphephandaba kodwa ezokwakha, lenhlalakahle, lokuthula kazithintwa.
Ungayizwa imota yezigulane ikhala icela ukudlula kwezinye okufika engqondweni yikuthi ukhona osewele engozini, kumbe osegula okuthithibalisayo; akufiki kuwe ukuthi mhlawumbe kungaba ngumama ozithweleyo osekumele akhululeke.
Abantwana besikolo labo bengezwa kuthiwa usibanibanyana ubizelwe ehofisini kamphathisikolo kuhle kuqale ukunyenyezelwana ukuthi uzaphiwa itabusi ezingaki.
Lumhlaba unjalo vele, uhlaba nje ngoba yikho esikukhangeleleyo kuwo mihla yonke, kakho obona okuhle loba kukuphi okwenzakalayo.
Kakho owake wahlanyela amabele wavuna inyawuthi, ngenkulumo zansukuzonke ezimunyu sihlanyela impazamo sivune ingxabangxoza.
Baqinisile abadala nxa bethi umlomo uyaloya, inkulumo enganhle idala inyembezi uqobo sokugcwalisekile obekutshiwo.
Amazwi entukuthelo atshiwo kalulana ikakhulu ebantwaneni ngoba bephambanise okuthile, asengezelela izimilo ezonakeleyo kibo bese kusonakala isizwe.
Into esuka imangalise yikuthi lanxa kwenzakale okuhle okumele kubukwe, kukhangelwa ngokuthandabuza.
Kulula ukukholwa ukuba umntwana wonile kulokukholwa ukuba uphumelele ezifundweni abezenza.
Abanye phela nxa besiya emtshadweni balanda ukuzibonela ukuthi uzibani lowaya obesetshiywe yisikhathi uyatshada sibili.
Ukucubungula okwenziwa abantu abaphumelele kokuthile kuyamangalisa.
Othole umsebenzi omutsha, kuthiwa “asazi ukuthi ubhadale malini ukuze awuthole.”
Ophumelelayo kubhizimusi yakhe kuthiwa “ulabondofa.”
Kutshiwo lokhu lalokhuya ngalo lalowaya ngoba benze okungcono kulalokhu okukhangelelweyo.
Njengoba abadala besitsho “nyama umnandi ungafakwa itswayi,” nxa sekunguwe owenze okuthile okuhle kuba buhlungu ukuzwa abanye bekhuluma amagama amabi ngawe.
Kwesinye isikhathi, ukucabanga ngokubi okungatshiwo kuwe ngenxa yento enhle osuyenzile kwenza ufise ukuthi kungaziwa ukuba wenzeni.
Awulitholi lethuba lokujabulela ukuphumelela kwakho ngoba usesaba isiphatho ozasithola kumphakathi.
Ukunanzelela okuhle okwenzileyo akusi kuziphakamisa kodwa lithuba elihle lokuba ubonge abakusizileyo ukuba ufike la osukhona.
Lithuba lokukhangela emuva uthathe izifundo ozifunde kunhambo yakho ukuze ulungiselele inhambo ezayo.
Yikho lapho okhokha khona umoya ujabulele izithelo zezithukuthuku zakho. Lawe uke ubobotheke okwesikhatshana; ukwenza njalo kuyawuhlakaniphisa umzimba.
Nxa ungacabanga ngokuthi bathini abantu ngeke walithola leli thuba ngoba ungezake wathokozisa umthwakazi wonke.
Ngakho kungakuthokozisa okwenzileyo nxa kusithi utshaye usabhenqu, mtshaye, nxa kuyingquzu ingenele.
Ungatshayi indiva ukunqoba okwenzileyo lanxa kuncane kanjani, kujabulele, nxa kuyikuthi ujabula ngokuqolotsha, qolotsha!
Thintana loTrevor Mhlanga kunombolo zikamakhal’ ekhukhwini ezithi: +263775523605 kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
