uMthunywa
YiNtatheli kaMthunywa
IKHANSILI yakoBulawayo iyathuthuka nanko phela kunyanga ezimbili ezilandelayo iGodini Mall izaqala ukwakhiwa ngenhloso yokuthuthukisa idolobho leli njalo kukhangelelwe ukuthi abantu abedlula i-1 000 bathole imisebenzi.
Intuthuko le iza ngemva kwesivumelwano sekhansili yakoBulawayo kanye lenkampani edabuka kweleSouth Africa ethiwa yiTerracotta Private Limited, ukuba ithuthukise indawo le ngokwakha kutsha ngendlela elohlonzi.
UMnumzana Mathew McCormick ongomunye wenkokheli zeTerracotta Private Limited ekhuluma emhlanganweni lo uchaze ukuthi umsebenzi lo uzathuthukisa izakhiwo ezikule indawo.
“Indlela esizakwakha ngayo iGodini Mall izaguqula indawo le ibenhle kakhulu ngoba sizakwakha ngonhlonzi lwaphezulu.
“Sikhangelele ukuthi indawo le itshengise intuthuko enkulu lapha koBulawayo ngoba yiyo ezahlanganisa uBulawayo lamazwe angaphandle afana leBotswana, Zambia, South Africa kanye lamanye amazwe njengoba inengi labantu lizabe lisehlela khona livela emazweni aphetsheya,” kutsho uMnu McCormick.
Ekhuluma kulo umhlangano omele uSodolobho wakoBulawayo, uKhansila Gift Banda uchaze ukuthi balokujabula okukhulu njengekhansili yakoBulawayo ngoba indawo le sizafana lezinye indawo ezitshengisa intuthuko elizweni.
“Ukwakhiwa kweGodini kuyathokozisa kakhulu ngoba kuyathuthukisa uBulawayo. Lokhu kungenxa yokuthi indawo le sizaba ngenye yendawo eziveza intuthuko kuleli ngoba kuzabe kulendawo zokudlela lezokuthengisela ezihlanzekileyo njalo ezisemthethweni.
“Okunye njalo indawo le izakuba lempompi zamanzi ezihlanzekileyo okuyikho okwengeza ukuthuthuka kwezempilakahle lapha koBulawayo,” kutsho uMnu Banda.
UMnu Banda uqhubekele phambili njalo wachaza ukuthi ukwakhiwa kwale indawo kuzangezelela umsebenzi koBulawayo.
“Ukwakhiwa kweGodini Mall kuzangezelela inani lemisebenzi lapha koBulawayo okuyikho ukuthuthuka kukaBulawayo. Lokhu kungenxa yokuthi kuzakuba lomsebenzi wokwakha izakhiwo lezi, ukuthengisa emakhefa kanye lezitolo eziyabe sezakhiwe kule indawo.
“Abanye abantu bazaqhatshwa njalo ekulindeni indawo le kanye lekubhaleni amabhasi ayabe engena lapha kanye laphumayo. Ngalokhu-ke minengi imisebenzi ezavuleka ngokwakhiwa kwale indawo,” kuphetha uMnu Banda.