uMthunywa
Trevor Mhlanga
“HLALA phansi udle amathambo engqondo, ukuphathe njani? Uzwa njani ngakho? Ubona sengazathi ungekela abantu bekuphatha ngalindlela uzafa wahlonipheka na? Kumele umhlaba wazi ukuba awusi sidwedwe somuntu. Kumele lumuntu umenze isibonelo!” Ngiyazi suke wayicabanga limicabango njalo uyazi mhlophe owakwenzayo emva kwalokho. Ukuzisola esikhathini esinengi kuqala ngemicabango enje. Kulento ezimbili ezingenza ufike kulesi sigaba, okokuqala; yikuthi lumuntu okuphathe nxele ukwenze ebandla abantu bonke bekhangele lawe wazizwa wembulwe izidwaba. Okwesibili; yikuthi lokhu okungahle kwenziwe kuwe kwenziwe ngumuntu oseduze kakhulu kuwe obungakhangelelanga ukuba engakuphatha ngalindlela.
Nansi imfihlakalo esegcekeni, kuya ngokuthi ngubani okuphathe kubi futhi ekwenzela ngaphi; umuntu engakuwankala ngempama esititshini sebhasi, impi engavuka lapha ingamiswa libutho likaTshaka. Kube kanti omunye engakuthi wa ngempama ngasese, uqala uthithibale, bese uzibuza ukuthi kunga kutheni andukuba uthathe inyathelo. Umuntu ongamaziyo engakuyangisa emphakathini, lanxa lingaxabana mzwanokho uyaphanga ukukhohlwa ngakho, kodwa uba umngane ongamathe lolimi lawe, kumbe isihlobo esiseduze singenza okufanayo ukuxabana kwenu kungaba ngokweminyaka. Ukufungelana ijoyi akulani lokuthi isizatho sokuxabana yisiphi kodwa kusebudlelwaneni obukhona phakathi kwalabo abalifungayo. Lokhu kutsho ukuthi ukucaphuka uyazikhethela lokuxola yisinqumo sakho.
Akugobo lingeqondiswe, kodwa nxa ophethe insimbi engazimiselanga ukuyikhanda ayiqondise izahlala injalo. Kukuwe ukuthi uyafuna kumbe cha ukulungisisa okonakeleyo. Okuyindikimba yendaba namhla yikuthi, ifindo lingabotshwa emathunjini ukudla akungeke kudlule, futhi oleqhubu nguye ozwa ukubaba kwalo. Ngamafitshane, nxa uphanjanisiwe ikakhulu ngumuntu oseduze kuwe, kawuzenzeli sisa ngokungamxoleli. Inhliziyo ingakutshela ukuthi impazamo eyenziwe kuwe yedlulisa amalawulo ngeke yaxolelwa, kodwa sonke lesi sikhathi osichitha ubophe umoya uyakhukhuzeka ngaphakathi. Ngaze uphumelele okunganani empilweni, ngokuba lomuntu ongamxolelanga, uba lesizatho sokuhlukuleka.
Ukuxola akulula ngoba kutsho ukuzehlisa, ukukhanya sengazathi zilele ukuze uzikhulule entilongweni yemoyeni. Lo ophambanisileyo akudingeki ukuba axolise ukuba umxolele, kudingeka kuphela ukuba unanzelele okuqakathekileyo kulenzondo le olayo. Impilo kayaziwa, kusasa kungenzeka umuntu ofanayo omthukutheleyo nguye ozibambileyo kunhlanganiso engakuqatsha, kumbe nguye udokotela okumele akuhlolele umkakho. Ungaphila njani ungafika esigabeni esinjalo lapho impilo yakho sokumele uyifake ezandleni zomuntu omfungele ijoyi lamakhala abomvu? Angitsho ukuthi kumele uvumele abantu bakwenze ikhabitshi yabo, kodwa ngithi nxa sekwenzakele ukuba uphanjaniswe, ungachithi iminyaka ugcine inzondo, phola!!!!
Thintana loTrevor Mhlanga kunombolo zikamakhal’ ekhukhwini ezithi: +263775 523605 kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
