uMthunywa
Silo Trevor Mhlanga
NGESILUNGU lindawo bayibiza indlu yokusebenza gadalala, omongi labomongikazi abangena kuyo ngabalolwazi kuphela; umkhosi ohlatshwa la uzunguza imiduli, kodwa nxa sekwedlule ukuklabalala kuthiwa amhlophe.
Ukuphatha umntwana ngezakhe ingalo kwenza owesifazana awufise umhelo ngoba kulenjabulo enkulu nxa isizelwe ingane, ubuhlungu bokubeletha buphanga bukhohlakale.
Kulezinye izinto ezingakuphathi kahle nxa udlula kuzo, othi nxa uhlangana lazo akuvumi ukuchuma; ezikubhenqulayo, zikubhensise, zikuphe umhedehede kodwa ziletha injabulo ekucineni.
Kuya thithibalisa ukucabanga ngokuthi uhinahineke, kodwa nxa usazi impumela yokungamnandanga odlula kukho; njengo mama ofikelwa ngumhelo uthi “alala, woza buhlungu.”
Nxa kugejwa igolide kudingwa iziqhwaga ezazi kakuhle ukuphosa ipiki lefotsholo lazo zonke izikhali ezifaneleyo. Inyanga zingaphela umsebenzi wokugebha ungathi yizithukuthuku zenja, kodwa mzwana litholakala kuletha intokozo ehamba ngazo zombili. Liyathathwa ilitshe liyecholwa, libuye ligeziswe ngomuthi wokulihlamba, beselithelwa eziko elitshisa vutha. Kuthi sekwenzakele konke lokhu, ing’khona kuyaphuma igolide elicwebezelayo eliyigugu.
Lapho okhona manje kungenzeka ukuba uzibona ungasi nto yalutho, lokhu akutsho ukuba awuqakathekanga. Njenge golide elimbelwe yinhlabathi, ukuphakama kwakho kufihlwe ngokuyizenzo lemikhuba okuthandayo okukusitha ukuzazi lokuzibeka endaweni yakho efaneleyo. Lanxa kubuhlungu, kufanele uzehlukanise lakho konke lokhu okukuguba impumelelo okungafana lokungabongi; ukuthanda intokozo endaweni yomsebenzi; ukusebenza ngobuhlobo lobungane endaweni yolwazi lobuciko; ukungathembakali; lolaka.
Nxa umama ekhululeka kudingakala abalolwazi ukumphathisa, lanxa kugejwa igolide ngabalamandla lolwazi abakwenzayo lokhu. Kumpilo yakho dinga abalolwazi ukukusiza ekuhambeni kwakho, phela indlela ibuzwa kwabaphambili. Akusi wonkana muntu ogudlana laye olelizwi elifanale ukulalelwa abanye yinhlabathi nje okumele isuswe kuwe.
Nanku okubuhlungu okumele ukwenze, tshiyana labantu abangela sizo kuwe lanxa beke baba losizo izolo. Usane emva kokuhlala inyanga eziyisitshiya galo lunye esiswini sika nina, nxa seluzelwe kumele luqunywe inkaba ukuze luphile. Igolide elicwebezelayo ngelitshisiyweyo lasuswa konke obekunamathelane lalo. Angidali ingxabano ebantwini abangamathe lolimi lapha kodwa yikukhuthaza ukuba ilo lalo kafunde ukuzenzela. Nxa sekusiza ekukhetheni okuqondane lempilo yakho, ungalaleli lokhu abangane kumbe izihlobo ezithanda ukwenze, yenza okufaneleyo lozaziqhenya ngakho emva kokuncwetshwa indlebe ngabalolwazi. Vele ezinye izinqumo ziyatshisa njenge ziko elibaselwe laphindwa kasikhombisa, kusesiziko elinjalo lapho igolide eliphuma khona linkanyazela. Nxa umlilo usuvutha ngamandla uhlambulula impilo yakho, ngakho ungakhonyelwa ngeyinye inkunzi, kalizwakale elakho ilizwi linquma lanxa lezo zinqumo zizakwenza uthi, “alala kubuhlungu!!!”
λ Thintana lo Trevor Mhlanga kunombolo zikamakhal’ ekhukhwini ezithi: +263775523605 kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
