uMthunywa
Silo Trevor Mhlanga
EZINYE izinto kazichasiseki. Nxa usithi uyakhuluma kuba sengazathi ulimi luvuvukile, amazinyo akhumukile, umhlathi wome qha, lomlomo awuvuleki.
Ukhanya kuphela ngokucwayiza okungapheliyo lokudlaladlalisa izandla ukuba kukhona ozama ukukutsho kodwa amazwi anamathele emphinjeni, kakho ongaluzwa lolo limi olukhulumayo.
Esikhathini esinengi kungathi ingqondo lenhliziyo kulolimi lakho kodwa olulamabala angatholakaliyo kulezi ndimi ezizwakalayo. Ukusuthiseka okupheleleyo nxa kusehlula ekukhulumeni, kukanganani kumpilo ngokugcwala kwayo?
Kungaba lendawo na, kumbe lokuthile okungenziwa ukuze umuntu azizwe esuthisekile empilweni? Lo umbuzo uyimpicabadala, insindabaphenduli, ijwabu elingatshukekiyo; ngoba ulempendulo ezinengi ezibonakala ziqondile zonke kusiya ngokuzwisisa komuntu.
Okunye okungemukeleka njengento emsuthisayo umuntu, yikuphumelela, kodwa-ke lakho kuzwisiseka ngendlela ezehlukeneyo lezinengikazi ukuthi kutshoni.
Kufana lokubala inani lamanzi edamu ngezandla ukuzama ukulandelela umkhondo wokuthi kutshoni ukuphumelela. Kusukela ekutheni injongo, kumbe umgomo obukhangelelwe ufinyelelwe na? Kukanti-ke lanxa ufinyelelwe kuba lomunye umgomo osuka uvumbuluke, kuqhubekela phambili ngenxa yombono othile umuntu alawo.
Okuyikuthi kakho oseke wafika esigabeni sokuphumelela okwaneleyo, inhliziyo yathi jidi phansi ngoba esenelisekile. Isimanga yikuthi lapha esisebenza khona, sibuthelela inotho, sithenga amahawu okuzivikela nxa ingozi isiza; sikwenza konke lokhu ngoba sidinga ukuhlaliseka esikwazi kamhlophe ukuba ngeke sikuthole ngokupheleleyo.
Imfihlo esegcekeni yikuthi thina abantu abansundu siyakholwa. Lokhu kusegazini lethu, kakho ongela akukholwayo. Yilokhu kukholwa okusenza singalahli ithemba lanxa impilo isinzima kanganani, kusipha amandla esimweni esimi manzonzo, kuyasisekela nxa amehlo sebona kalufifi. Inkolo esibhahile yisiKrestu esilesisekelo esiliBhayibhili. Ngitsho lasemthethwandaba iBhayibhili liyethenjwa njengo gwalo olumumethe iqiniso umuntu angafunga ngalo.
Ngezinye indlela liyinsika yezimiso ezilawula impilo jikelele. Lapho ke, umuntu okholwa ebhayibhilini ulakho ukusuthiseka nxa engenza lokhu okulotshwe kulo. Kumenza azizwe enelisekile lanxa engasakutholanga konke abekukhangelele empilweni, ukugcwalisa okukhangelelwe liBhayibhili kugabhela ezinye izinto.
Akubambeki ukukholwa, yinto yangaphakathi ezwisiswa lulimi loluya lwengqondo lenhliziyo. Yikho nje kulula ukuba ufinyelele ukuthula kwangaphakathi nxa ukholwa.
IBhayibhili, elaziwa njengelizwi likaNkululunkulu yisikhali esihle ekuhlakuleleni lekulondolozeni ukukholwa, ngoba amazwi alo ethinta ngaphakathi. Kubambe lokhu, akukho ukuphumula kumbe ukuphumelela lapho kungekho ukuthula, ukukholwa kuyakuletha lokhu kukholwa emuntwini, leBhayibhili liyakugcina kunengi labantu. Izithelo zalokhu zingebambeke ngezandla, ngoba ukuphumelela kwangempela kuhambo mpilo ilihlo lingekubone!!!
Thintana loTrevor Mhlanga kunombolo zikamakhal’ ekhukhwini ezithi: +263 775 523 605
Kumbe kumakheli omqhafazo la: [email protected]; Facebook: Trevor Mhlanga; Twitter: @MhlangaTrev
