uMthunywa
Ethel Ncube
KULEMULI yeNyamandlovu ezidla amathambo engqondo ngesiga sokubulawelwa esinye isihlobo sayo ebesiyisigulane esibhedlela seIngutsheni koBulawayo ngezinye izigulane ngeviki ephelileyo.
UCrispen Ncube obegula umkhuhlane wengqondo kubikwa ufe ngemva kokuba etshaywe kabuhlungu ngezinye izigulane zakulesi sibhedlela.
Abasiki bebunda babikele iphephandaba likazulu ukuthi ngemva kokubhubha kukaCrispen etshaywe ngezinye izigulane esinye njalo isigulane siphinde satshaywa safa ngempelaviki yonale edluleyo kodwa kukhanya le akusinto ekhulunywayo iyafihlwa.
Isigulane sesibili akusatholakalanga ibizo laso kodwa ngeseNyamandlovu.
Intatheli ixhumane lesinye isakhamuzi seNyamandlovu uMnumzana Jabulani Moyo oveze ukuthi okwenzakala esibhedlela lesi kuyadanisa njalo abantu abalawo amathe ngalokhu.
“Njengezakhamizi silemibuzo eminengi ngabantwabethu abafe besesibhedlela se-Ingutsheni, sibuhlungu ngokutshaywa kwabo okubangele ukuthi bafe.
“Silemibuzo eminengi ngesiga lesi, ukuthi omongikazi yindaba bengazami icebo nxa kulabanye abahluphayo babafake bodwa balindwe ngamapholisa. Sekulahleke imiphefumulo eminengi kakhulu kungelamizamo eyenziwayo.
“Sitshiya abantu esibhedlela lesi sithembile ukuthi bazahlala bephephile njalo bathole ukwelatshwa ngoba emakhaya behlupha njalo isibhedlela sikhatshana. Nxa sebezabulawa endaweni ebesiyithembile ukuthi ingabatholisa ukusila kungelazizatho ezicacayo kuhamba njani?” kutsho uMnu Moyo.
Iphephandaba likazulu lixhumane lomunye oyisihlobo sikamuyi oziveze ngokuthi nguNcube nje kuphela obike ukuba kuliqiniso ukuthi uCrispen kasekho.
“Simhambise esibhedlela sabagula ingqondo kwathi kungakapheli iviki sezwa kuthiwa usebhubhile utshaywe ngabanye abagula ingqondo waze wafa. “Sizwa ubuhlungu kakhulu ukuthi mhlawumbe ngabe kayanga samgcina ekhaya ngabe silaye. Asazi ukuthi bakuhambisa njani umuntu abhulwe aze atshone, omongikazi lamapholisa abakhangelayo bebengaphi?
“Into edanisayo yikuthi omongikazi bangibikela ukuthi indaba le ngingayithi vu ebantwini, bazaphatha umsebenzi lokungcwaba umuyi. Bangakwenza lokhu kodwa umbuzo engilawo yikuthi lokhu kuzamvusa yini.
“Bangaki abazatshaywa babulawe kungabindabazalutho? Phezu kwalokhu abasichasiseli ukuthi kwahamba njani sibisibili,” kulandisa uMnu Ncube.
Iphephandaba likazulu likhulumisane lesinye isisebenzi sesibhedlela esale ukuziveza ngoba singavunyelwa ukukhuluma lentatheli, sachaza ukuthi ukhona owabhubhayo esibhedlela lesi ngemva kokutshaywa ngezinye izigulane.
“Zikhona ezinye izigulane ezathelela omunye zambhula kabuhlungu, ngokuswelakala kwenhlanhla wabhubha.
Lokhu kwenzakala sibili akusiyonto yokucabangela,” kutsho isisebenzi lesi.
UMthunywa ukhulumisane losobhuku walapho obekuhlala khona umuyi uMnumzana David Moyo obike ukuthi sokutshone abantu ababili abavela endaweni yakhe bebulawa ngezinye izigulane.
“Sesilahlekelwe yimiphefumulo yabantu ababili ngeviki eyodwa abavela eNyamandlovu abatshaywe ngezinye izigulane baze babhubha. Sicela ababona ngezempilakahle bakhangelisise ngaloludaba abantu bengakapheli kuthathwe amanyathelo izigulane zingabulalani mahlanyana,” kutsho uSobhuku Moyo.
Iphephandaba likazulu lixhumane loActing Chief Executive Officer we-Ingutsheni Hospital uMnumzana Nyasha Chibvongodze oveze ukuthi kuliqiniso ukuthi kulesigulane esibhubhe ngemva kokutshaywa ngezinye izigulane.
Kathandanga ukukhuluma okunengi ngaloludaba.
“Yinto eyenzakalayo ukuthi kulezigulane ezatshaya omunye wafa,” kuphetha uMnu Chibvongodze.
