uMthunywa
Ethel Ncube
IZAKHAMIZI zakuWadi 4 eNyamandlovu sezichothoze inkampani ebona ngamagetsi iZesa ngokwehluleka kwayo ukulungisa intambo zamagetsi eziwayo osokubangele ukufa komuntu oyedwa kanye lokulimala kwababili, uMthunywa uyakuveza lokhu lamhlanje.
UMthunywa uzwe ukuthi bekulentambo zamagetsi ebeziwele phansi esigabeni lesi okubangele ukuthi uInnocent Matoko atshaywe ngamagetsi afe edlula ngomdududu kwathi uMoses okungasatholakalanga isibongo sakhe walimala kanye lomntwana otshe izandla.
Ingozi lezi zenzakale ngeviki ephelileyo.
Intatheli ikhulumisane lesinye isakhamuzi uNkosazana Sipho Dube esiveze ukukhonona okukhulu ngezisebenzi zeZesa ezingenzi umsebenzi wazo ngesikhathi.
“Angazi ukuthi kungani izisebenzi zeZesa zisekela intambo zilenga phansi ngoba impilo zabantu zisengozini njengoba oyedwa esedlule kuthi ababili sebelimele.
“Intambo lezi zawelwa yisihlahla esawiswa lizulu kodwa kazizange zilungiswe sezize zabangela ukufa komuntu,” kutsho uMnu Dube.
Uqhubekele phambili eveza ukuthi lo owabhubhayo watshaywa ngamagetsi la ehamba ngomdududu.
“Umfana lo , uMatoko ubhubhe ngendlela ebuhlungu ngenxa yokwehluleka kweZesa, kambe etshaywa ligetsi ephezu komdududu esiyakuwa phansi.
“Intambo kumele zihlale zikhangelwa hatshi ukuhlala baze balindele ingozi,” kutsho uNkszn Dube.
Ekhuluma lentatheli uMnumzana Jethro Nyoni laye oyisakhamuzi uchaze ukuthi kungcono ukuthi inkampani yamagetsi ngesikhathi sezulu ihlale ilandelela iqaphele ukuqamuka kwentambo ngenxa yokuwa kwezihlahla.
“Abazame ukuthi bahlale bekhangela ukuthi akulasihlahla esifika entanjeni zamagetsi ukuze kungasweleki imiphefumulo yabantu.
“Amagetsi ayingozi enkulu kakhulu, nxa ethe abaluhlupho nanko selimaze abantu abulala oyedwa. Umntwana lo owatsha izandla kwaba yinhlanhla ukuthi kwakulomzali eduze kungenjalo ngabe sikhuluma okunye,” kutsho uMnu Nyoni.
Iphephandaba likazulu likhulumisane njalo lokhansila wakule indawo uMnumzana David Moyo ochaze ukuthi kuliqiniso ukuthi kulomuntu owabulawa ngamagetsi.
“Kwalimala abantu ababili, umntwana watsha izandla kodwa okwakhathesi usengcono.
“Kukanti uMoses yena wayehamba loMatoko owabhubhayo ngomdududu kungakho yena walimala ngaphsni kwembambo.
“Sicela ukuba inkampani yamagetsi ivakatshele indawo yethu ifundise abantu ngengozi yawo njalo abantu kababike masinyane nxa sekuwe intambo phansi kumbe nxa umbane sutshaye izigodo zentambo zamagetsi. Okunye ngithanda ukukhuthaza izakhamizi ukuthi zingathola intambo ziwele phansi zingasondeli ngoba bengazi ukuthi zilomlilo kumbe hatshi,” kutsho uKhansila Moyo.
Imizamo yokukhulumisana lalowo osindileyo yehlule ngoba ucingo lwakhe lungangeni. Kuthi ngakolunye uhlangothi imizamo yokukhulumisana lesikhulumi senkampani yeZimbabwe Electricity Distribution Company uMnumzana Fullard Gwasira yehlule ngoba umakhalekhukhwini wakhe ubengangeni.
