uMthunywa
Ethel Ncube
AZILANKANI izakhamizi zeMatobo ngemva kokuba omakorokoza beKapara Mine betshaye omunye wabo waze wafa kubangwa igolide.
Indaba le yenzakale emavikini asanda kwedlula eKapara Mine lapho omakorokoza abathathu abatshaye uThemba Moyo waze wafa kubangwa igolide.
Kubikwa ukuba abane laba babegebha emgodini munye kwacatsha igolide basebecabangela uMoyo.
Intatheli ixhumane lomunye wabomakorokaza bakule indawo uMnumzana Mbonisi Siziba oveze ukuba abalankani labafana laba.
“Abafana laba bagebha bathwala amatshe sebesiyagigisa, bathe besekugigiseni babamba igolide elingaba yi-3 grammes balibeka bengakalithengisi.
“Bathe belibekile lacatsha bahle bathi litshontshwe nguMoyo bahle bamhlasela ngezikhali ezehlukeneyo, amahloka, induku, amatshe wasala umzimba ungakhangeleki bethi bafuna igolide.
“Umuyi wathwalelwa esibhedlela seMaphisa wadluliselwa eMpilo lapho afika kwehlula khona,” kutsho uMnu Siziba
Kusitatimende samapholisa ekhasini labo leTwitter baveze ukuba babophe abafana abane abasolwa ngokubulala.
“Amapholisa asebophe ometheswacala abathathu ababalisa uLuwine Pasikwane oleminyaka engu-33, Elias Phiri oleminyaka engu-36 yokuzalawa, Tafadzwa Bauren oleminyaka engu-24 loKudzanai Chizvenda oleminyaka engu-27 abacatshengelwa ukuba yibo ababangela ukufa kukaThemba Moyo ngemva kokumtshaya besithi untshontshe igolide labo,” kuphetha isitatimende lesi.
