uMthunywa
Ngamafitshane kesikhangele ukulandula
Ukulandula kwakhiwa ngokusebenzisa izakhi zokulandula u: aku-; asi-; akusi-
Isibonelo: mina – akumina; akusimina, asimina, bona – akubona, asibona, asibo, akusibona; akusibo.
Lona – akulona; asilona, akusilona, akusilo njalonjalo. Nanzelela mfundi ukuthi amanye amabala asebenza kakhulu esiZulwini hatshi esiNdebeleni.
Izibanjalo ezakhiwe ezabizwaneni zokukhomba Kulolu luhlu olulandelayo uzaqaphela ukwakhiwa kwezibanjalo zokukhomba ezabizwaneni zokukhomba eduze, buqamama lakude.
Khangela isabizwana sokukhomba kusukela kusigaba 1 Eduze lo, Buqamama lowo, Kude lowaya. Isigaba 2 Eduze laba, Buqamama labo, Kude labaya. Isigaba 3 Eduze lo, Buqamama lowo, Kude lowaya. Isigaba 5 Eduze leli, Buqamama lelo, Kude leliya. Isigaba 6 Eduze la, Buqamama lawa, Kude lawaya.
Nanzi izibanjalo ezakhiwa kulezo zabizwana kuzigaba eziqanjwe ngaphezulu: Kusigaba 1 Eduze isibanjalo nguyilo, Buqamama yilowo, Kude yilowaya.
Kusigaba 2 Eduze isibanjalo ngu yilaba, Buqamama yilabo, Kude yilabaya. Kusigaba 3 Eduze isibanjalo ngu yilo, Buqamama yilowo, Kude yilowaya. Kusigaba 4 Eduze isibanjalo nguyile, Buqamama yileyo, Kude yileya. Kusigaba 5 Eduze isibanjalo yileli, Buqamama yilelo, Kude yileliya.
Kusigaba 6 Eduze isibanjalo nguyila, Buqamama yilawa, Kude yilawaya njalonjalo.
Kuviki ezayo sizaqala kusibanjalo sokulandula.