uMthunywa
YiNtatheli kaMthunywa
OMONGIKAZI abaqeqetshwa esibhedlela seHwange Colliery kusukela ngomnyaka ka-2013 bazathola izithupha zabo kumkhosi ozaqhutshwa ngoLwesine edolobheni leHwange.
Kubikwa kuzaqeqetshwa omongikazi abangu-97. Ikolitshi leli lisesibhedlela esingaphansi kwenkampani emba amalahle eyeHwange Colliery Company.
Isibhedlela lesi yiso esikhulu esabelweni seMatabeleland North.
Ngenxa yodubo lokuswela imali ngaphansi komkhonomi owaphosa wabhidliza inkampani yamalahle, bekunzima ukuthi omongikazi abaphuma eHwange Colliery School of Nursing baphiwe izithupha kumbe ukwenzela umcimbi wokuqeda kwabo isikolo.
Isikhulumi seHwange Colliery uNkosikazi Rugare Dhobbie ubikele iphephandaba likazulu ngoLwesithathu ekuseni ukuba lonyaka bazaqeqetsha bonke omongikazi abaqeda kusukela ngo-2013 kuze kufike khathesi.
Uthe inkampani isizamile ukuqhuba inhlelo zayo zokuvuselela ngakho bonke omongikazi abaqeqetshwa yisibhedlela sabo sebezabongwa njengalokhu okwakusenziwa kudala.
UNkkz Dhobbie uthe indikimba yokugcotshwa kwabonesi abangu-97 laba kuzaqhutshwa ngaphansi kwendikimba ethi: “Ubongikazi yikuhlangana kobungcitshi lebhizimusi.”
“Sithanda ukwethula emphakathini weHwange lakuzizalwane zeZimbabwe umbiko wokuthi ikolitshi lethu leHwange Colliery Company School of Nursing izakwenza umkhosi wokunikeza omongikazi abangu-97 izithupha.
Umkhosi lo uzahlanganisa bonke omongikazi abaqeqetshwa kuleli kolitshi kusukela ngo2013. Sizabanika izithupha, imendulo leminye imivuzo enkundleni yeCricket Club lapha eHwange,” kutsho uNkkz Dhobbie.
Uqhubeke wathi isizatho sokwenziwa kwalumkhosi yikuthi inkampani yeHwange Colliery isiphakama.
“Kuminyaka edluleyo bekunzima kodwa kulandela ukuzimisela kwethu ukuvuselela inkampani, sekubelula ukuthi sikhumbule inhlelo eziqakathekileyo. Ngakho-ke, kusukela kulumnyaka sizahlala sibonga omongikazi bethu. Sizimisele kulokho.”
Kubikwa umphathintambo wezokwembiwa kuHulumende uWinston Chitando nguye ozavula lumkhosi.
“Sikhangelele ukuthi zonke iziphathamandla zikaHulumende, izisebenzi ezibona ngezempilakahle kanye lalabo abaseHwange Colliery babekhona.
“Inkampani yeHwange Colliery izimisele ukusebenzelana lomphakathi oseHwange ukuze inhlelo zayo ziphumelele. Sikhangelele ukuthi impilakahle yezisebenzi zethu iphakame.”
