uMthunywa
Ethel Ncube
ZISELE zikhuza imihlola izakhamizi zeJongela eNkayi kulandela ukuzwa ngesalukazi ebesigcine uphondo olulegazi labantu okucatshangelwa ukuba lulamandla okubulala kanye lokwehlisa umnyama etrankini.
UMthunywa uzwe ukuba umniniphondo ubethi angaluvuthela igazi eliphakathi lehle phansi kubesekusithi lo okuqanjwe ibizo lakhe ahle ehlelwe ngamashwa khonapho khonapho.
Kukanti igazi eliphakathi lingachithekela phansi lo obiziweyo uhle afe.
Impicabadala le ivele ngeviki edluleyo.
Iphephandaba likazulu lisizwa ngalumshikashika liphuthume layawela kule indawo ukuze lizwisise ngodaba lolu.
UMthunywa uzwe ukuthi uZondwase Tshuma utholakale egcine uphondo ebhokisini elihlala izigqoko ngenhloso yokuganga ngalo.
Intatheli ikhulume lezakhamizi zakule indawo ebezilokhu zethukile ngesehlakalo lesi.
UMnumzana Mkhokheli Mathuthu uchaze ukuthi kwakhitshwa uphondo emzini kaMaTshuma.
“Uphondo lwaphuma sibili lelo liqiniso sonke esasikhona salubona lulegazi phakathi kodwa lalingagcwalanga.
“Abalukhiphayo baveza ukuthi belusentshenziswa ukuthi ezinye izakhamizi zingaphumeleli njalo beluhamba luyekuzwa ntambama abantu nxa bexoxa njengezimuli lube selusiyabikela umnikazi yena obehle aluvuthele ukuze labobantu bangaphumeleli,” kulandisa uMnu Mathuthu.
UNkosazana Silindiwe Ngwenya uveze ukuthi bebehlala bekhathazekile ukuthi kungani ugogo MaTshuma ehlala ekwazi konke okwenzakalayo esigabeni.
“Besihlala simangala ukuthi ugogo akulanto angayaziyo laloba yenzakale ebusuku uvuka ekwazi kanti utshelwa luphondo lwakhe.
“Satshelwa futhi ukuthi ubethi engathi eluvuthela uphondo lolu kuchitheke igazi bekusifa umuntu,” kubika uNkszn Ngwenya.
UMthunywa uvakatshele uMaTshuma emzini wakhe ovumileyo ukuthi wayelophondo.
“Uphondo ngalukhipha ebhokisini elihlala impahla zami njalo lwalulegazi.
“Ukuthi ngolwenyamazana bani kangikwazi sibili kodwa bathi bengisithi ngingaluvuthela ngigangela abanye, lokho mina angikwazi kodwa baluthatha bayalutshisa.
“Bangisiza kakhulu lababantu lasendlini yami lapho oluphume khona sokulaleka,” kuphetha ugogo Tshuma.
