uMthunywa
Cornelius Luphahla
KULESALUKAZI esileminyaka yokuzalwa engu-99 esitholakale sifile eceleni kwendlela esigabeni seMafa eLupane sivela bhalisa ukuvota.
Umuyi uSilindiwe Ndlovu ubhubhe ngeviki ephelileyo.
Kubikwa uNdlovu wasuka emzini wakhe esiyabhalisa ukuvota esikolo seMafa Primary qede watholakala ngemva kosuku olulodwa efile endleleni, uMthunywa ukuzwile lokhu.
UMthunywa uvakatshele kule indawo wakhulumisana loMnumzana Jacob Ndlovu oyisihlobo sikamuyi walandisa ngendaba le ethi imzwisa ubuhlungu kakhulu.
“Ugogo wasuka ekhaya esiyabhalisa ukuvota esikolo samangala sesibona engasaphenduki sasesibikela izakhamizi kanye losobhuku ukuthi ugogo kasimboni. Ngalesosikhathi sahle saqalisa ukumdinga kodwa kasizange sambona.
“Kwathi kusasa kwakhona ekuseni simdinga kwabuya uNkosikazi Ndlovu wathi umthole efile eceleni kwendlela sahle sayathatha isidumbu sakhe sasisa esibhedlela seSt Luke’s. Isiga lesi singizwisa ubuhlungu kakhulu ngoba kangikwazi ukuthi kuyini okwambulalayo,” kutsho uMnu Ndlovu.
UNkosazana Sindiso Ncube oyisakhamuzi kule indawo ubikele intatheli ukuthi yena ubona angani umuyi wabulawa yikutshiswa lilanga.
“Mina ngokubona kwami ugogo angabe elinyazwe yikutshiswa lilanga ngoba mhlalokho lalitshisa kakhulu. Ngitsho ngoba isidumbu sakhe sasithola egcekeni okungela zihlahla khona. Ngalokhu engabe watshiswa kakhulu lilanga wasephela amandla wehluleka ukuyaphumula emthunzini.
“Okunye njalo ngibona angani ngabe wayehamba lomunye umuntu wayengasoze afe,” kutsho uNkszn Ncube.
Usobhuku wakule indawo uMnumzana Bikita Ncube ebuzwa ngale indaba uvumile ukuthi yenzakala wathi imzwisa ubuhlungu ngoba iyaqala ukwenzakala esigabeni sakhe.
“Indaba yokufa kukaNkszn Ndlovu ingidanisile kakhulu njalo kuyaqala ukwenzakala isiga esinje esigabeni sami,” kuphetha uMnu Ncube.
Kusenjalo izizalwane zakuleli zimatasatasa ngokubhalisa ukuvota okukhona ngo2018.
