uMthunywa
Cornelius Luphahla
ZIMADOLONZIMA njalo zikhuza umhlola izakhamizi zesigabeni seSilozwi eMatopo ngemva kokunyamalala kwesinye isalukazi sakule indawo ngemva kokukhitshwa kwenyoka ebisetshenziswa ukuthakatha okubikwa yatshiywa ngumkaso, uMthunywa ukuzwile lokhu.
Impicabadala le yenzakale mhlaka 28 Mfumfu lapho uNkosikazi Simanga Moyo (92) asuka emzini wakhe ethi uyabona umntanakhe uMlinda Dube ohlala epulazini elibuqamama lalesisigaba kodwa kazange aphinde abonakale.
UMthunywa uzwe ukuthi inyoka eyakhitshwa koNkkz Moyo yayisemqamelweni njalo izakhamizi sezikholelwa ukuba otsikamutanda abenza lokhu bangabe belesandla ekunyamalaleni kwakhe ngoba kahlawulanga inkomo yomsebenzi lo.
Ekhuluma lentatheli uMnumzana David Ndebele oyisakhamuzi sakule indawo uthe otsikamutanda laba yibo abafaka inyoka emqamelweni kaMaMoyo njalo balamanga.
“Otsikamutanda laba yibo abafaka inyoka emqamelweni kaMaMoyo besenzela ukuthi kuthiwe bamkhiphele inyoka bona beqamba amanga befuna inkomo yakhe. Kuthe ngemva kwalokho bathi inyoka le yiyo ebisenza abazukulu bakhe bengaphumeleli kungakho wasehlawuliswa inkomo,” kutsho uMnu Ndebele.
UNkosazana Lilian Mangena ubikele intatheli ukuthi otsikamutanda laba bagangile njalo bayakwazi lapho okulesalukazi lesi.
“Otsikamutanda laba bagangile sibili njalo siyakholwa ukuthi bayakwazi lapho uMaMoyo akhona. Ngitsho ngoba ekuqaleni bathi uhamba labondofa eguswini ngemva kwalokho bathi sefile kodwa kabachazi ukuthi ufele ngaphi njalo kabafuni ukumlanda bathi bafuna inkomo eziyisikhombisa ukuze bamveze kungakedluli amahola amabili.
“Lokhu kwenza ngikholwe sibili ukuthi bayakwazi ukuthi ungaphi nanko phela wathi ngemva kokunyamalala kwakhe sisiyababikela bathi bona kabadlalelwa yikho enyamalele,” kuveza uNkszn Mangena.
UMnumzana Andrew Magama uthe otsikamutanda laba balamanga kakhulu njalo bagangile ngoba benza izinto ezimbi kakhulu.
“Okunye njalo okwenza ngithi otsikamutanda laba bagangile njalo bayakwazi lapho okuloMaMoyo khona yikuthi bathi befika eHalale kwafa umntwana ngendlela engacaciyo. Kuthe kunjalo bathi ngemva kokukhipha inyoka le koMaMoyo bathatha inkomo babuya bathi kabayiphiwanga yikho ugogo enyamalele khonapho beqamba amanga.
“Kusiya ngami ngabe otsikamutanda laba bayaxotshwa esigabeni ngoba sesikhathele ngabo njalo bayehluleka ukulungisa izinto labondofa bakhona ababakhuphayo kasibaboni sizwa kuthiwa sebekhutshiwe kuphela. Kuthi kunjalo inyoka ezikhutshwayo ndawo zonke ngamabululu kuphela okusuka kumangalise ukuthi kambe abantu bengagcina mhlobo munye wenyoka njani?” kulandisa uMnu Magama.
UNkosazana Esnat Dube ongumntakaNkszn Moyo ebuzwa ngale indaba uthe uzwa ubuhlungu kakhulu ngokunyamalala kukanina njalo ufisa ukuthi ngabe unina uyabonakala bamngcwabe njengabantu bonke.
“Mina ngizwa ubuhlungu kakhulu ngokunyamalala kukamama ngemva kokugconwa kuthiwa ubegcine inyoka. Isifiso sami yikuthi aluba uyabonakala noma sefile simngcwabe njengabantu bonke hatshi ukuthi alobele egangeni.
“Ngokubona kwami umama wazonda ukuthi bamgcona ngobuthakatha yena engazi lutho yikho wacina esuka ekhaya wasenyamalala. Okwakhathesi sidinga usizo lokuthi simbone umzali wethu njalo sihlutshwa yikuthi kasilazo inkomo eziyisikhombisa ezabizwa ngabaphurofethi ukuze basidingele umama,” kuphetha uNkszn Dube.
