uMthunywa
YiNtatheli KaMthunywa
INTSHA yakuleli kumele ikhuthalele ukuphatheka kwezemidlalo ukuze yenelise ukuthuthukisa impilo zayo kanye lokuphakamisa isizwe.
La ngamazwi enduna uKhayisa.
Induna le iveze lokhu ngesikhathi isungula inkezo yobukhosi ezadlalelwa yiHighlanders leManzini Warriors yaseSwaziland mhlaka 25 Nhlolanja.
Inkezo le izancintiselwa njalo langamaqembu amanengi aseAfrica, ngemizamo yokwakha ukubambana phakathi kwamazwe eAfrica ngokusebenzisa umdlalo wenguqu.
Induna uKhayisa, uNhlanhlayamangwe Ndiweni, ubikele umphakathi ukuba isizatho sabo ngesokusebenzisa umdlalo webhola likanobhutshuzwayo ukuthi abantu beAfrica babambane.
Uthe kungumbono wakhe ukuthi inkezo le izaletha ingqubekela phambili elizweni ngokuhuga amankampani lamabhizimusi asebenza kwezemidlalo.
“Icebo lokusungula inkezo le livela ekuthini sinanzelele ukuthi akula umdlalo ongabambanisa abantu bakithi ngaphandle kwenguqu. Sihlose ukuthi loba kuzadlala iHighlanders leManzini Wanderers, inkezo le isabalala igoqele lamanye amaqembu eAfrica.
“Le yinkezo yabantu ngakho kumele isekelwe ngoba izakwakha ikusasa labantwabethu lokuthuthukisa amathalenta abo. Lapha sikhuluma ngokuthi sizavula imisebenzi emitsha, sisondeze amabhizimusi ezemidlalo zizavuselela impilo zabantu bakithi,” kutsho induna uKhayisa.
Inkezo le yabunjwa ngesizini edluleyo iHighlanders ithakazelela iminyaka engamatshumi ayisitshiya galolunye kodwa abaqoqi bayo sebecabange ukuthi kwengezelelwe lamanye amaqembu asemazweni angeNingizimu yeAfrica.
Kuhlandla lakuqala lenkezo le, iBosso yanqoba iqembu leBotswana iGilsport 2-0.
Kodwa mhla kusungulwa inkezo, inkokheli zeHighlanders kazilugxobanga kulumkhosi ngoLwesihlanu olwedluleyo.
Ngokutsho kwabaqoqi benkezo bebenxuse iHighlanders lezinye iziphathamandla. Bekungela ngitsho inkokheli yaleliqembu.
Loba uMthunywa engasatholanga umbono kaModern Ngwenya osaphethe isikhundla sikamgcinisihlalo weHighlanders, kutholakale udletshana lokuthi iqembu leli lilezikhalazo ezithile.
IHighlanders ifuna ukuthi abaqoqi benkezo bacace ngemali lezinye indingeko zabadlali.
Isikhulumi sequla eliqoqa inkezo le uNjabulo Ncube ubikele iphephandaba likazulu ukuthi kulandela ukusungulwa kwenkezo, sebelinde ukuthi amaqembu eHighlanders leManzini Wanderers aqale ukulungiselela umdlalo wabo.
“Iqembu leManzini Wanderers selithe lizimisele ukuthi lize koBulawayo lizodlala leHighlanders mhlaka 25 kuyonale inyanga enkundleni yeBarbourfields,” kutsho uNcube.
