uMthunywa
Mthokozisi Dube
IMIDLALO yabasakhulayo eyama African Union Sports Council Region V izakwenzelwa eAngola ekupheleni komnyaka njalo kukhangelelwe ukuthi amazwe amanengi ayephatheka kule imidlalo.
Iqembu leZimbabwe lona selibike ukuba alizukuyaphatheka kuphela kule imidlalo kodwa lifuna ukuyabuya lithwele izicoco ezizachaza ukuba lalingayanga dlala nje kodwa laliyevuna.
Ekhuluma lentatheli yezemidlalo kuliviki okhokhela leliqembu uTirivashe Nheweyembwa ubike ukuba umkhosi walonyaka uzabe ulomehluko kulandela ukuthi iqembu leli libe lesikhathi eside lilolonga uma kuqathaniswa lokomnyaka ka-2014.
“Khathesi kumele sijabulise abalandeli bethu ngoba usekelo siluthole kuseselesikhathi okusipha umlandu omkhulu ukuthi thina njengeqembu kumele siyedonsa nzima,” kubika uNheweyembwa.
Emidlalweni ka-2014 iqembu leli labasesigabeni sesibili lilandela iSouth Africa njalo lonyaka likhangelele ukuhluthuna imendulo kuyo yonke imidlalo kanye leJudo.
“Imidlalo efana lale uyinqoba ngokulungiselela kusaselesikhathi kungakho iqembu lethu selilesikhathi laqala ukuqhuba amalungiselelo,” kuchaza uNheweyembwa.
UNheweyembwa ubike ukuba lonyaka abaziboni bebikwa njengabantu abadinga usekelo lwemali ngoba kungahle kubulale amalungiselelo abo ngoba uHulumende wabatholisa usekelo olwaneleyo.
Imidlalo ezancintiswa eAngola ibalisa ukugijima, ibhola lenyawo, i-basketball, i-netball, i-judo, i-boxing, i-swimming kanye leminye imidlalo.
“Lonyaka amagolide siwafuna kuyo yonke imidlalo hatshi kwezokugijima kuphela,” kubika uNheweyembwa.
Imidlalo yamaAUSC iqhutshwa ngemva kweminyaka emibili. IZimbabwe yaqhuba imidlalo le ngomnyaka ka-2014 njalo yatshayelwa ihlombe ngamazwe ayekuleli ngokwenelisa ukuqoqa kuhle lumdlalo.
