. . . uselilunga leTsholotsho FC

YiNtatheli kaMthunywa
UMGCINISIHLALO wenhlanganiso yeZimbabwe Football Association emhlubulweni ongezansi yelizwe, uMusa Mandaza usebike ukuba inhlanyelo ayifaka ngomnyaka ka-1989 isilethe izithelo kulandela ukungena kweqembu leTsholotsho FC kuligi yaphezulu.UMandaza ubike ukuba  wafika eTsholotsho ngo-1989 ezobumba inhlelo zebhola kulindawo njalo ngesikhathi lesi wayelephupho lokubona iqembu eliphuma emaphandleni liseqela kuligi ephezulu.

“Abalandeli benguqu bahlezi bengibuza ukuba kungani ngingafuni ukungena esikhundleni sokuthuthukiswa komdlalo wenguqu ebangeni eliphezulu. Mina ngihlezi ngibika ukuba ngigxile kubadlali abasakhulayo,” kubika uMandaza.

“Okwamanje ngizizwa ngikhululeka ngokuthi iphupho lami lokubona ithimu yemaphandleni idlala kuPSL seligcwalisekile. Okwenziwe yiTsholotsho kuyangikhulula,” kuveza uMandaza.

Uthe kusukela kulisizini usesekela Iziqholo zeZhwane.

“Sengililunga leTsholotsho ngoba ithimu le sisuke layo kudala.”

Ubike ukuba iTsholotsho FC kumele ithole usekelo lonke ukuze yenelise ukuhlala ibambelele kuligi ephakemeyo.
“Asifuni ukuthi iqembu lemakhaya leli lingene kuligi okwesikhatshana nje. Sifuna lifike lihluthune inkezo hatshi ukwemukwa ukudla emlonyeni njengalokhu okwenzakala kwamanye amathimu.

Kusenjalo uMandaza ubike ukuba isizini  edluleyo ibinzima kumathimu ka-Division One ngenxa yokuswelaka kosekelo lwamankampani, kungakho bakhangelele ububelo kulisizini.

“Siyabe sikhangelele ukunika amaqembu labadlali imvuzo elomfutho kodwa ngokuswelakala kwabasekeli kuba nzima,” kubika uMandaza.

Umgcinisihlalo lo uthe ngesikhathi sombuso wakhe ukhangelele ukuthi kuphakame amaqembu amanengi.

“Kuzakuba lamaqembu amanengi aphuma kuligi yethu azadlala kuPSL kuminyaka elandelayo. Njengoba iphupho lami lakuqala seligcwalisekile, ngilokukholwa ukuthi sizabona amathimu amanengi azavulelwa inhlanhla ngokungena kuPSL.
“ITsholotsho FC iphakamise umdlalo wethu ku-Division One. Amaqembu wonke afisa ukuphakama kumele alandele okwenziwe yiTsholotsho,” kutsho uMandaza.