uMthunywa
YiNtatheli kaMthunywa
UMGADLI weqembu leChicken Inn uEdmore “Spanela” Chirambadare usebike ukuba iphupho lakhe lokuyadlalela amaqembu amakhulu eSouth Africa seligcwaliseka.
Umdlali lo ubikele iphephandaba likazulu ukuba kusukela esafunda esikolo wayefisa ukuthi ayezama inhlanhla eSouth Africa.
NgoLwesibili uMthunywa uxoxe lomdlali lo osanda kuvela ePretoria lapho iChicken Inn ebidlala leMamelodi Sundowns kumkhankaso weCaf Champions League.
“Iphupho lami seliseduzane lokugcwaliseka. Umdlalo wenguqu kweleSouth Africa ngiyawuzwisisa njalo kade ngafisa ukuthi ngidlale khona. Iqembu leChicken Inn selinginikeze ithuba elihle lokuthi ngibonakale enkundleni zeSouth Africa. Ngibona angathi ngizaphumuelela kulisizini,” kutsho umdlali lo ngesikhathi ephumula endlini yakhe.
Umgadli lo ophinda atshibilikele iqembu lesizwe amaWarriors ubike ukuthi ukudlala kusigaba senkezo yeCaf Champions League kumtshiye eledlabuzane lokuthi aqhubeke edlala ngamandla kulisizini.
“Ngizaphindisela engihlala ngikwenza. Sengizizwa ngingumdlali okumele ahlohle ancedise ukuthi abanye bahlohle njalo. Kuzabonakala nxa isizini iqalisa ngoba sonke kuChicken Inn siyatshisa kulizini. Ukuyadlala eGoli kuzafika ngesikhathi iChicken Inn isithaphuze amaqembu amanengi.
“Loba ngilesifiso sokuthi ngiyedlala phetsheya, ngiseselomlandu wokuthi ngiqhubeke ngidlalela iChicken Inn. Ukuphumelela kwethimu le yikuphumelela kwami.”
Ngokudlala kakuhle akwenzileyo bedibene leMamelodi Sundowns, uChirambadare unconywe kakhulu kubulembu beSuperSport. Ingcitshi zenguqu zibika ukuthi umdlalo wakhe ngaphambili kwenkundla utshiye iSundowns ivuma ukuthi imvimbi zayo zibhobokile.
Ngesizini edluleyo uChirambadare ukhethwe kukhalenda yengcitshi zabadlali zeligi yeCastle Lager.
Uthe ubonga kakhulu umqeqetshi weChicken Inn uJoey Antipas okunguye omkhuthaza njalonje, okumenza azethembe ukuthi ngelinye ilanga uzatshibilika ngaphandle kwelizwe.
