uMthunywa
Msilisi Dube
KULENDODA ehlala elokitshini leNkulumane 5 koBulawayo okubikwa yangena kwenye indlu izenza ipholisa andubana iphulule intombazana eleminyaka yokuzalwa engu-12 amabele.
Umsolwa (35) esingeke samqamba ngebizo ngenhloso yokuvikela umamangala wenze icala leli mhlaka 24 kunyanga esanda kwedlula ngesikhathi ekomamangala abangomakhelwane.
Umtshutshisi wecala leli, uMnumzana Mufaro Mageza ubikele inkundla yeWestern Commonage ukuba ngelanga leli umsolwa wafika ngakibo kamamangala ezenza ipholisa andubana amphulule amabele wasemlaya ukuba angatsheli muntu ngoba angakwenza lokhu uzambulala.
Kubikwa phakathi kwenyanga kaNkwenkwezi umsolwa wahlangana lonina kamamangala evela emavinkilini basebezixoxela njengabomakhelwane.
Umsolwa kubikwa wayesehlala evakatshela inina leli endlini yalo kokuphela waze wajayelana lomamangala.
Ngelanga leli kubikwa umsolwa wasuka wayavakatshela unina kamamangala wamthola engekho ngakho waseqala ukuxoxa lomamangala.
Kubikwa umsolwa waqilibezela umamangala wamtshela ukuba kulodaba afuna ukumtshela lona. Ngesikhathi umsolwa ekhuluma lamazwi kubikwa wayephulula umamangala amabele emtshela ukuthi uyamthanda.
Ngemva kwesenzo lesi kubikwa umsolwa walaya umamangala ukuba angatsheli muntu kodwa umamangala wayabikela umbalisi wakhe esikolo.
Umbalisi nguye owabika udaba emapholiseni okwenza umsolwa abotshwe.
Ebuzwa nguMantshi umsolwa wale wemba phansi ukuba wakwenza lokhu.
Umantshi uthole umsolwa elecala wasesithi ahlawule imali engange-$150 kumbe avalelwe esitokisini okwenyanga eyodwa.
