uMthunywa
Johas Moyo
ZILOKHE zididekile izakhamizi zeLuveve koBulawayo ngeziga ezelekanayo zobugebengu nanko phela ngemva kokudlwengulwa kwababalisi esikolo seLuveve kumaviki amabili edluleyo, sokuphinde njalo kwatholakala ipholisa lifile amathumbu ephandle isidumbu sitshwathikwe esihotsheni esiduzane lemasimini, uMthunywa uyakuveza lokhu lamhlanje.
NgoMgqibelo odluleyo ngehola lesificaminwe mibili kutholakale isidumbu sikaShephard Mhlanga ongaba leminyaka engu-30 duzane kwesikolo seLuveve sesonakele okucatshangelwa ukuthi besesilensuku ezimbalwa silapho ngaphansi kwesihlahla esikhulu.
Umuyi akwaziwa ukuthi wabulawa ngubani kodwa amathumbu ayesegcekeni njalo lesandla siqunyiwe.
Kubikwa umuyi ubehlala eLuveve-Gwabalanda njalo ubesebenzela eNkayi esabelweni seMatabeleland North.
Isidumbu sikamuyi kubikwa sabonwa ekuseni ngabafana ababegamula inkuni ababikela ezinye izakhamizi zafonela amapholisa.
UMthunywa esizwa ngalindaba kazange aphozise amaseko kodwa wahle waphuthuma wayafika kuleyondawo lapho athola khona izakhamizi zibuthene zibona insindabaphenduli le, njalo lempukane zasezibhuza yonke indawo.
Intatheli yenelise ukukhuluma labafana abayibo abaqala ukubona isidumbu lesi baveza balandisa kabanzi.
“Thina besizidingela inkuni zokupheka inqina lethu emasimini sathi siwela esihotsheni sabona into esamuntu elele phansi yikho ukusondela kwethu, sethuka sibona impukane njalo sananzelela ukuthi ngumuntu ofileyo sasesibiza abanye obhudi akade bexoxa eduze sabatshengisa,” kutsho omunye wabafana labo othande ukwaziwa ngokuthi nguThabo.
Phansi kwalapho obekulesidumbu lesi bekulamavili emota okungabe kuveza ukuthi ipholisa leli kalibulawelwanga kuleyondawo kodwa isidumbu singabe sabuya sithwelwe yimota sazotshiywa kuleyondawo.
UMthunywa uphinde waxhumana lesinye isakhamuzi uMnumzana Mpikelelo Mthombeni oveze ukuthi kungabe kuyizigebengu ezigangileyo ezabulala umuntu lo zabuya zazophosa isidumbu esihotsheni lesi.
“Amavili emota ayabe evelangaphi kambe emasimini? Lokhu kuveza sobala ukuthi umuntu lo wabulawa isidumbu sazotshiywa lapha. Thina ukuze sizefika lapha sibizwe ngabafana sizihlalele ematsheni sinatha. Abafana laba bebephaphatheka sabantu ababone isipoko emini basebesitshela ukuthi babone isidumbu ngaphansi kwesihlahla, mina ngasengifonela amapholisa.
“Asenelisanga ukubona ubuso bakhe umuyi ngoba wayelele ekhangelise ubuso phansi kodwa ngananzelela ukuthi wayengani uqunywe isandla laphansi kwesisu wayekhanya ukuthi ulenxeba lanxa sesaba ukumbamba,” kutsho uMnu Mthombeni.
UMthunywa kenelisanga ukuxhumana labemuli kamuyi. Isikhulumi samapholisa koBulawayo uInspector Precious Simango uvumile ukuthi bamukele umbiko lo njalo amapholisa asachwayisisa ngalelicala.
