uMthunywa
Thokozile Mbedzi
KULEPHOLISA lesigabeni seNhwali eGwanda elilume enye indoda layikhupha amakhala kubangwa ukuthi ibhije utshwala.
UYonah Phiri owayelipholisa kubikwa ulume uJohnson Mdlongwa wamqatha amakhala kubangwa utshwala ngeSonto kuyonale iviki.
UMthunywa uzwe ukuthi uPhiri loMdlongwa babekwejisile bezinathela umagwebu kodwa uMdlongwa wasebhija utshwala okuyikho okubaxabanisileyo.
Kubikwa uPhiri wathi ebona ukuthi utshwala basebuphelile wasukela uMdlongwa wamtshaya andubana amngqqathule amakhala.
UMthunywa uxhumane loMnumzana Tapelo Sebata laye owayesetshwaleni wathi ababili laba babenatha bonke baze baxabane.
“Impi ivuke uMdlongwa esenathe waqeda utshwala, uPhiri kwahle kwamcunula waqala ukulwa. Ababili laba besilwa uPhiri babemkhulela ngamandla yikho nje wacina eseluma uMdlongwa wamkhipha amakhala,” kulandisa uMnu Sebata.
Kubikwa ababili laba beqalisa ukulwa abantu abazange babanake ngoba bahlala besilwa benganatha.
Esinye isakhamuzi uNkosazana Ratanang Moyo obekhona etshwaleni uthe bona babe lesithuli ngesenzo sikaPhiri yena osuke waba lomona wokulimaza omunye wakhe bona benatha bonke.
“Thina sikwazi abantu botshwala bethandana kakhulu hatshi lokhu esikwenzelwe nguPhiri kulihlazo esigabeni, ukuqatha omunye amakhala.
“Sonke ebesikhona sibelesithuli ngesenzo lesi, asifisi ukuba kwenzakale njalo esigabeni sethu ngoba kuletha imfundiso embi njalo uPhiri ubelipholisa lomthetho lanxa engasasebenzi kumele atshengise ukuba ubengumuntu womthetho,” kutsho uNkszn Moyo.
Ababili laba bahle baya emapholiseni.
Isikhulumi samapholisa esabelweni seMatabeleland South uInspector Philisani Ndebele ebuzwa ngaloludaba uthe kalukafiki ewofisini yakhe.
“Udaba lolu njengoba lwenzakele izolo alukafiki ehofisini yami, ngithemba luzafika,” kuphetha uInsp Ndebele.