uMthunywa
YiNtatheli kaMthunywa
KULENINA elisesithenjini esigabeni seChivero eMhondoro, eseliveze ukuthi latshontsha isikhindi sikanyanewabo lasifaka amanalithi phakathi laphakathi andubana lihlanganise lemithi lasifaka phakathi kwembodlela yayo eledobi.
Insindabaphenduli le ivele edale lenduna uChivero ensukwini ezisanda kwedlula lapho okuphumele khona egcekeni ukuthi inina leli elingumfazi wesibili elihlala ngaphansi kukaSobhuku uChikanga latshontsha isikhindi sikanyanewabo njalo lasigcina phakathi kwembodlela eledobi elihlala lilayo zikhathi zonke.
Ithumba leli libhoboke ngesikhathi izihlobo zendoda yenina leli zibona impahla le phakathi kwempahla zenina leli ezazisesikhwameni.
Indaba le ethoniswe edale lenduna uChivero, uBrown Shopo njalo icala licine lisidla indoda ebathetheyo nanko phela inkundla ithe kumele ahlawule unkosikazi wakhe omdala ngenkomo ezimbili.
Unobhala edale lenduna le, uMnumzana Silent Kaseke uthe inina leli, uEveresi Shaura watshontsha impahla zikanina omdala ngesikhathi beseHarare, wahamba lazo ekhaya lapho okwatholakala khona esinye isikhindi siphakathi kwembodlela eledobi lemithi njalo lihlatshwe ngamanalithi amane phakathi.
Lokhu yikho okwenza indaba le imangalwe edale lenduna.
“ULivingstone Takaendesa ulamakhosikazi amabili — omdala uPrisca Shoko lomncane uEveresi Shaura.
Indoda le yayibalekele unkosikazi wayo omdala yayahlala lomncane eHarare.
“ULivingstone wasuka lonkosikazi wakhe omncane sebesiyatshengisa abadala usane olusanda kuzalwa lapho okwafika kwabonakala impahla zaphakathi zikanyanewabo.
“Lokhu kwabonwa nguninazala kanye lobabakazi wabantwabakhe lapho okwahle kwavela indaba yonke yasisiwa edale lenduna,” kuveza uMnu Kaseke.
Edale kwavela ukuthi uLivingstone wavakatsha ngakibo wafika ebusuku elonkosikazi wakhe omncane kanye losane kodwa ngenxa yokuthi wayengamtshelanga unina ukuthi usethethe omunye umfazi unina wala ukubamukela endlini yakhe okwacina kubangela ukuthi bayelala kwenye nje indlu engelabantu.
Inkundla izwe ukuthi ngelanga elilandelayo ababili laba bavuka bayakibo komfazi ngaphansi kukasobhuku uBure kodwa batshiya izikhwama zabo endlini le.
Kubikwa unkosikazi omdala, uShoko wasala etshayela uninazala ucingo emazisa ukuthi kulempahla zakhe ezinyamaleleyo njalo waveza ukuthi ucabangela unyanewabo.
“Lokhu kwenza ukuthi uninazala asale esetsha izikhwama zikamalukazana wakhe ayezitshiyile.
“Yikho lapho abathola igabha ledobi elilamanzi, lesikhindi esifakwe umuthi njalo sihlatshwe ngamanalithi phakathi,” kutsho uMnu Kaseke.
Kubikwa phakathi kwegabha leli kwakulenhlabathi ayayibotshelwe ephepheni okucatshangelwa ukuthi wacupha unyawo lukanyanewabo.
“Umfazi omdala wachasiselwa ngempahla abazibonayo wathi yilo kanye ayengaliboni.
Kubikwa uEveresi wahle wehluleka ukubuyela kwabozala ngenxa yenhloni waya kudadewabo womkakhe uEfiness Takaendesa (28) kwesinye isiqinti.
Kubikwa uEveresi wafika wacela ukuthi aphelekezelwe ukuyathatha izikhwama zakhe kwabozala.
UEveresi ebuzwa ngembodlela le wavuma ukuthi imbodlela le ngeyakhe njalo uhamba layo kukanti iphenti eliphakathi ngelikanyanewabo.
“UEveresi kubikwa wathi lo ngumuthi wokuthi angazithwali awuphiwa ngugogo wakhe njalo angahlali esesikhathini.
Idale lithe lokhu yikucatsha ngomunwe.
Kubikwa uEveresi wancitshwa izikhwama zakhe kukanti umkakhe laye ebona lokhu waqonda kunina esiyacela isikhwama sakhe kodwa laye wasincitshwa.
UEffiness owayehamba phambili kundaba le, kubikwa wabikela umnewabo, uLivingstone ukuthi ahambe lamakhosikazi akhe womabili enduneni ukuze indaba le ilungisiswe kodwa wakwala lokhu.
Kubikwa imuli le isibiziwe enduneni uLivingstone wahamba lonkosikazi wakhe omdala kuphela.
Igabha lakhitshwa njengobufakazi lilesikhindi esimnyama. Ngaphandle kokuba ledobi igabha leli lalilamanzi, imithi kanye lamanalithi ayehlatshelwe ephentini.
Ngemva kokuthola ubufakazi inkundla yenduna iqume ukuthi uLivingstone ahlawule unkosikazi wakhe omdala ngenkomo ezimbili kusiyaphela inyanga kaNkwenkwezi.
Izihlobo zikaShoko ezazisenkundleni zaveza ukuthi kungaba lokubi okuzawela umntanabo bazamusa kibo kukaEveresi babone ukuthi benzani ukuze asile.
Induna yakulesi isigaba induna uBrown Shopo Chivero ucebise abesifazana abasesithenjini ukuthi bangasebenziselani imithi ukuze bathandwe kodwa uthe bapheke ukudla okumnandi njalo bageze ukwedlula labo abancintisana labo.
