uMthunywa
Cornelius Luphahla
IQEMBU elihlabela ingoma zodumo we-rumba elidabuka eNkayi iUnited Killers elitshaya umculo walo likweleSouth Africa seliphekele uzulu idlalade elitshisayo njalo abakhangelele ukulethulela uzulu okusemthethweni ekupheleni kwayonale inyanga.
Iqembu leli lasungulwa ngomnyaka ka2014 njalo ngelakuqala ukucula i-rumba eMatabeleland North nanko phela amaqembu ahlabela umculo lo amanengi adabuka emhlubulweni weMatabeleland South ikakhulu ePlumtree leKezi.
Inthatheli ixhumane lomholi waleliqembu uKizdon Ncube wathi lokhe basungula iqembu leli sebakhipha amadlalade amabili njalo abantu bayawuthakazelela kakhulu umculo wabo.
“Njengoba iqembu lethu lileminyaka emibili salisungula sesakhipha amadlalade amabili. Elakuqala ngelika2014 elithi Ama 50-50, kulandele elika2015 elithi Funda Kibo. Leli ke yilo elithandwa kakhulu ngabantu ikakhulu abantu abadala ngoba likhuthaza ontanga ukuthi indlela ibuzwa kwabadala libuye likhulume ngendlela abantu okufanele bahlalisane ngayo empilweni.
“Khathesi sesipheke elinye njalo idlalade njalo leli-ke limnandi okwedlulisileyo. Ngilethemba lokuthi ngemva kokukhipha idlalade leli abantu bemhlubulweni wakithi eMatabeleland North bazabona ukuthi lathi silaso isiphiwo sokucula i-rumba,” kutsho uKizdon.
UKizdon uqhubekele phambili wathi nxa ekhipha idlalade kafaki ingoma ezinengi ngoba utshaya ingoma ezilomnkantsho.
“Idlalade lami leli engiliphekileyo lilengoma eziyisithupha ngoba zinde. Okunye njalo ingoma lezi zikhuluma indaba ezilohlonzi kakhulu ziphindaphinda njengezulu lemvimbi ukuze inkulumo eziyimumetheyo izwakale,” kutsho uKizdon Ncube.
Umsekeli kamholi waleliqembu uWillmore Ncube uthe ngendlela idlalade labo abalipheke ngayo kungani bacula bebanengi.
“Thina eqenjini lethu sicula sibahlanu kuphela kodwa ngendlela esitshaya ngayo kungathi sibanengi kakhulu.
Eqenjini lethu silomholi weqembu uKizdon Ncube, lami, loBonani Ndlovu, uPromise Dube kanye loPromise Ncube.
“Ngalokhu-ke abalandeli bethu kabalindele ezimnandi njalo sisazovakatshela kwelakithi koMthwakazi sifafaza umculo wethu,” kuphetha uWillmore.
