uMthunywa
Cornelius Luphahla
INYOSI zamadlozi ebezifuywa phakathi kwengungu yenye indoda yeLupane zivuke ubhova zahlasela umninizo andubana zibulale izifuyo njalo zitshiye abantwana ababili belalisiwe esibhedlela.
Indoda le uMethias Ngwenya wesigabeni seMateteni eLupane wehlelwe ngamashwa la ngoLwesihlanu kuviki ephelileyo.
Kubikwa inyosi lezi ebezifuywe phakathi kwengungu kuthiwa ngezamadlozi, zivuke ubhova zaluma zabulala imbuzi zikaMnu Ngwenya ezinhlanu kanye lenkukhu ezilitshumi zafa andubana zilume labantwana abancane ababili.
Intatheli ikhulumisane loMnumzana Clifford Nkosi omunye wezakhamizi zakule indawo oveze ukuthi okwenzakala koNgwenya kakaze akubone.
“Inyosi zikaNgwenya zasezilesikhathi eside zakha engungwini le njalo sasingakaze sizwe kuthiwa zilume umuntu.
Noma nje wayezithapha minyaka yonke kodwa zazingamvukeli yikho nje wayethi ngezamadlozi.
“Isimanga yikuthi sathi siziphumulele emthunzini womnyi sabona inyosi zithutsha zilubhobo ziphuma engungwini zingaqalwanga muntu zafika zasiluma lathi sabaleka.
“Ekusilumeni kwethu zabulala imbuzi kanye lenkukhu zabuya njalo zaluma labantwana kabuhlungu. Asazi kumbe amadlozi yiwo asemvukele yikho selunywa zinyosi njengoba wayethi ngezamadlozi,” kuchaza uMnu Nkosi.
UMthunywa ubuye njalo wakhulumisana loNkosazana Sibonginkosi Ncube onguye olabantwana abalunywa zinyosi lezi wachaza ukuthi ubuhlungu ngabantwabakhe abalunywe zinyosi.
“Umkami ngihlala ngimtshela ukuthi engabogcina inyosi lezi ekhaya ngoba kuyingozi. Khathesi nanku engihlala ngimtshela ngakho sokwenzakele inyosi sezilume abantwana zaqeda lezifuyo. Lakho kube yinhlanhla ngoba ngaphangisa ukuthutsha yikho nje zingasababulalanga abantwana,” kutsho uNkszn Ncube.
Ekhuluma loMthunywa uMnu Ngwenya uchaze ukuthi kalankani ngokwenziwe zinyosi lezi.
“Inyosi lezi kade zayakha lapha kodwa kazikaze zilume muntu kodwa ngamangala sengibona seziluma izifuyo labantu khonapho zingaqalwanga muntu. Ngokubona kwami zihlola okukhulu yikho nje ngahle ngayalahla ingungu yakhona egangeni ngisesaba ukuba ngingaphelelwa ngabantwana,” kutsho uMnu Ngwenya.
