uMthunywa
ZiNtatheli zikaMthunywa
ZISAMANGELE izakhamizi zeSomgolo eLupane ngenyoka ekhulumayo yomunye usobhuku ekhutshwe kuviki ephelileyo etshiye izakhamizi zonke zitshotshobele.
Inyoka le okubikwa ngekaSobhuku uSihlahla kubikwa yethuse izakhamizi ngobukhulu bayo kanye lokuzwakala ikhuluma samuntu lanxa ibikhuluma ulimi abangaluzwayo. Kuzwakale ukuthi inyoka le yatshiyelwa usobhuku ngabazali bakhe engakwazi.
Kubikwa mhla ikhutshwa abantu babegcwele emzini wakhe lwabatshaya lwabeqa uvalo iphuma ihwitha isiyagada isihlahla okwabangela ukuthi abantu, kugoqela lomphurofethi omkhulu uMaDlamini, bathi tsaha besesaba uhalabezi lwenyoka.
Isiphezulu kwesihlahla omunye wabaphurofethi okuthiwa nguTshukuza nguye owenelisa ukukhuluma layo.
UMthunywa wenelise ukuxoxa loThando Ndlovu othe wayekhona inyoka le ikhitshwa.
“Inyoka le yayisesabeka, bathe sebeyithandazele yabaleka ihwabha ngapha ikhuluma samuntu.
“Isimanga yikuthi ulimi eyayilukhuluma sasingaluzwa,” kutsho uNdlovu.
UNkosazana Melody Sibanda uthe akuthandabuzwa ukuthi inyoka le ibisetshenziswa ubuthakathi ngoba ibikhuluma.
“Lokhu ngathwetshulwa yingwe kangikaze ngizwe inyoka ekhulumayo kodwa mhla kukhitshwa inyoka yakoSihlahla ngazibonela ngawami la.
“UTshukuza nguye owacina ekhuluma layo andubana siyibone isisiyangena phakathi kwe-suitcase ngenxa yokuthi kwakungela owayelesibindi sokuyithwala ngezandla.
“Inyoka le yafakwa phakathi kwe-drum lapho okugcinwe khona impahla etshiyeneyo yobuthakathi njalo kulindwe ukuthi ize iphele amandla,” kutsho uNkszn Sibanda.
Intatheli yenelise njalo ukuxoxisana loMaDlamini onguye okhokhela ibandla lalabo abakhipha inonovithi yonke esetshenziswa ngabathakathi emisebenzini yabo.
“Inyoka esayikhipha kosobhuku yayisesabeka, yayinkulu okumangalisayo, lami nginje ngaze ngabaleka ngoba ngingeke ngiyimele.
“Ngesikhathi siyikhipha yayinkulu okumangalisayo kodwa khathesi isibohlile ngenxa yokuswela ukudla,” kutsho uMaDlamini.
UMaDlamini uphethe ngokuthi lokhe beyigcinile inyoka kasobhuku phakathi kwe-drum njengesijeziso.
“Inyoka le siyivalele phakathi kwe-drum njengesijeziso njalo kasiyiniki ukudla, sifuna ize iphele amandla, khona sizayitshisa ndawonye lezinye izinto ezilethwe ngabanye.
UMthunywa ucele ukubona inyoka le kwathiwa ngeke ayitshengiswe ngoba mncinyane kakhulu.
