uMthunywa
YENZE into yamehlo inyanga yaKwaMazambane eManguzi ngoMgqibelo itshada amakhosikazi ayo ayisithupha ngosuku olulodwa.
Lindumezulu yomtshado yamakhosikazi ayisithupha obuyibukhazikhazi kuthiwa ubize uR700 000.
UMnumzana Sokalezangoma Manzini (42), utshade lo-Alice Mthembu (32), Philile Ngwenya (32), Khethiwe Mtshali (34), Nana Mlambo (29) loSphiwe Ngwenya Manzini (21), abebegqoke amaveyili amhlophe. Umtshado omhlophe ube sesontweni.
Unkosikazi omdala uNkkz Katrina Mlambo Manzini (32), yena utshone ngo-2018. Kugcinwe usiko ngokuthi laye atshadiswe kulo mcimbi.
Omakoti bakwaNgwenya bona bahlobene, njengoba uPhilile engudadewabo kayise kaSphiwe. AbakwaMlambo kabahlobene.
UManzini uthe ubathanda ngokulingana bonke laba atshade labo.
“Laba bantu bangumuntu oyedwa, ngiyabathanda ngokufanayo. Yingakho ngibatshade kanyekanye, ngosuku olulodwa.
“Ngithandane labo ngezikhathi ezahlukeneyo, ngabalobola ngokwahlukana. Ngase ngibatshada ngosuku olulodwa. Kube ngumtshado omhlophe esontweni. Base beyogcagca ekhaya.
“Bamiswa phambili bonke esontweni, bemi ulayini. Bafunga ngokulandelana kwabo,” kutsho uManzini.
Uthe umtshado wabo bawuhlela kahle wabeka lemali eyaneleyo.
“Ajabule kakhulu amakhosikazi ami ukuba ngiwatshade ngosuku olulodwa. Owokucina ngithandane laye ngo-2018, ngamlobola lonyaka njengoba sesitshada.
Ngisebenzise uR700 000 umtshado uwonke. Bengifuna wonke umuntu abe lento ayithandayo. Wonke umuntu ubelengubo yakhe, ikhekhe lakhe, konke nje.
“Ngihlabe 10 izinkomo,” kutsho uManzini.
Uthe umtshado wabo ubhaliswe ngumfundisi obebatshadisa. “Siwubhalisile eMnyangweni wezaseKhaya umtshado wethu. Balazo bonke izincwadi zomtshado ukuthi bangamakhosikazi ami.
“Ngilabantwana lawo wonke amakhosikazi ami, kuKatrina bane, uMaMthembu bane, uPhilile bathathu, uKhethiwe babili, uNana bathathu, bese uSphiwe ulomntwana oyedwa. Umntanami wokucina ulonyaka lezinyanga ezintathu,” kutsho uManzini.
Amakhosikazi akhe awasebenzi, uKhethiwe MaMtshali, uyisangoma.
Eyala abantu besilisa uthe kusemqoka ukuba banakekele abantu abasuke bethandana labo.
“Ngiyacela abantu besilisa bafunde ukuthanda abantu babo, babahloniphe, babanakekele, baphinde babakhathalele. Kulesi sikhathi esimbi sokuhlukunyezwa kwabantu besifazane lezingane futhi kuyinyanga yabantu besifazane kusemqoka ukuba lokho sikutshumayeze kubantu besilisa. Ungathathi umntwana wabantu abe yifenitsha ongayikhokhele. Kuyalotsholwa. Umakhele lomuzi omuhle. Umthengele lemota unkosikazi.
“Amakhosikazi ami aloMercedes wonke. Bonke balemizi, balenkomo, izimbuzi lamahlathi,” kutsho uManzini.
Isithembu uthe yinto yakubo futhi usiphethe kahle.
“Isithembu ngesikamkhulu, wayelamakhosikazi awu-12. Ngisiphethe kahle isithembu sami. Ngiyahamba kuwona wonke amakhosikazi ngokwahlukahlukana, kujatshuliwe nje ekhaya. Ngihlala lenkosikazi ngayinye izinsuku ezintathu, ngihambe yonke imizi ngize ngibaqede,” kutsho uManzini.
Njengoba kade enze indumezulu ebuzwa ngemithetho yomvalelandlini, uthe uyilandele yonke.
“Besifake izifinyo, sisebenzisa lesibulalamagcikwane. Bekulabantu abangu-50 kuphela,” kutsho yena.
Ebuzwa ukuthi ngabe usemile yini ukukhetha, uphendule kanje: “Okwamanje ngisavalile ukuthatha amanye amakhosikazi. Kungenzeka kuqhubeke ngesinye isikhathi kodwa okwamanje nganele.”
Ubonge bonke abamesekile enza lo mtshado ukuthi ube yimpumelelo. — Ubulembu
