uMthunywa
INYANGA elodumo eMasvingo, uJulius Dehwa ongumhloli kuZimbabwe Traditional Healers Association (Zinatha) uphenduke isiphofu ngemva kokuqila esinye isigulane sakhe imota.
Umkhokheli weZinatha uProsper “Mpofu” Dhowai ebuzwa ngeviki ephelileyo, uthe yena kuzakuba lomhlangano omkhulu wokuqondisa isigilamkhuba esinguDhewa.
UMnumzana Mpofu uthe sokukanengi bebikwela ngobuqili lokungaziphathi kukaDhewa ngakho okungcono yikuthi axotshwe kunhlanganiso yabo ngoba engcolisa ibizo layo.
Intatheli zixhumane loDhewa ochaze ukuthi ngeqiniso seyisiphofu kodwa uphikile ukuthi lokhu kubangelwe yikutshontsha imota yesigulane sakhe.
Uphinde wachaza njalo ukuthi iZinatha ayila siqiniseko sokumbeka icala njalo konke okukhulunywa ngaye kungamanga.
“UDhowai lezinye izisebenzi zeZinatha balomhawu ngenxa yokuthi sengivule eyami ibhizimusi ethiwa yi Zimbabwe Association of Traditional Healers (Zatah) elemali enengi ukwedlula eyeZinatha,” kuchaza uDhewa.
UDhowai uthe emahofisini eZinatha ase Kyle House eMasvingo sebekhathele ngezikhalazo zabantu abalahlekelwa yimali lezifuyo zabo zithathwa nguDhewa labangane bakhe asebenza labo.
“IZinatha ilezisebenzi ezifika 7 000 esiqintini ngakho njengenhlanganiso ehloniphekayo ayiselasithunzi ngenxa yezenzo zikaDhewa ezimbi ngakho izakhetha umhloli omutsha okwesikhathi sonalesi kodwa ukhetho oluqotho luzakwenziwa masinyazana nje,” kuchaza uDhowai. — Ubulembu
