uMthunywa
Thokozile Mbedzi
IYUNIVESITHI yeNational University of Science and Technology (Nust) isilungise umhlobo we-laboratory entsha elakho ukuthwalwa iyefakwa lapho okumele kwenzelwe khona izifundo okuzenza kubelula ukuqhuba izifundo zeSayensi.
Ekhuluma lentatheli kumbukiso osanda kwedlula oweZimbabwe International Trade Fair, uMnumzana Enick Paradzayi uthe njengeyunivesithi sebelungise i-laboratory yokwenzela izifundo zeSayensi engasetshenziswa ukuqhuba izifundo lezi emadolobheni loba emaphandleni.
“Umhlobo lo we-laboratory uzenza izifundo zeSayensi ziye phambili. I-laboratory le ingasetshenziswa kuzo zonke indawo kungakhathalekile ukuba kusemadolobheni loba emakhaya.
“Yenza umthwalo ubelula kubabalisi ngoba nxa sikhangelane lobhubhane lweCovid-19 akumelanga abafundi baminyane e-laboratory okutsho ukuba abafundi kumele bangene ngamaqembu betshiyana okwenza abafundi bacine sebefunda sebediniwe abanye bacine bengasathakazeleli izifundo zeSayensi.
“Ngakho ngaloluhlobo lwe-laboratory konke lokhu ngeke kube kusahlupha ngoba ilakho ukufakwa emakilasini atshiyeneyo, abafundi lanxa bebhala imihloliso sebesenelisa ukuyibhala ngasikhathi sinye kungela kumelelana,” kuchasisa uMnu Paradzayi.
“I-laboratory le inhle ngoba ingadilizwa ibuye ihlanganiswe isifakwe lapho okumele kwenzelwe khona izifundo kungakho kayikhethi ndawo ingasetshenziswa ngitsho lasemaphandleni.
“Lokhu sokuzenza labantwana abakhubazekileyo bathakazelele izifundo zeSayensi ngoba ilakho ukufakwa lapho akhona angeke athwale nzima ukuthi aqanse. Sananzelela ukuthi abafundi abanengi abaphila lobugoga bacina bengathakazeleli izifundo zeSayensi kubangelwa ngumumo.”
Uphethe ngokuthi umhlobo lo we-laboratory uzenza labasesebancane labo baqale ukwenza izifundo zeSayensi ngoba sivele sigoqwa sisemanzi.
